Ва алайкум ассалом. Динимизда икки номаҳрамнинг холи жойда бирга бўлиши, гаплашиши мумкин эмас. Зинога, ёмон ишларга сабаб бўладиган нарсалардан тийилиши лозим. Сиз совчи қўйиб, тўйни тезлаштиришингиз ҳар тарафлама яхшидир. Аммо тўйга анча вақт бор бўлса, у ҳолда, ўша қиз билан гувоҳлар иштирокида гоҳ-гоҳида учрашиб турсангиз бўлади. Аммо гувоҳларсиз кўришиш, гаплашиш мумкин эмас. SMS, WhatsApp, электрон почта ва бошқа воситалар орқали ҳам. Сабаби бу шаклдаги мулоқот ҳам бориб-бориб кўришишга ва бошқа нохуш ҳолатларга сабаб бўлиши мумкин. “Йўқ, мен ўзимни назорат қила оламан”, дейишингиз мумкин. Бироқ ўртада кўп мулоқот бўлганидан кейин турли муаммо ва гап-сўзлар кўпаяди... Шу сабаб ҳар бир ишни чуқур ўйлаган ҳолда, пухта режа билан, асосийси шариат асосида бажарсангиз, икки дунёда юзингиз ёруғ бўлади.
     Бир-бирига бегона-номаҳрам йигит ва қизнинг ўзаро гаплашиши ҳеч бир тарафдан шариатга тўғри келмайди (никоҳдан олдин гувоҳлар иштирокида бир-бирини кўриши бундан мустасно). Бунинг ёлғиз чораси тўйни тезлаштириш ёки тўйдан олдинроқ никоҳ ўқитиб қўйишдир. Сиз сўраган масаланинг энг мақбул йўли тўйни кейинроқ қилиш шарти билан олдиндан никоҳ ўқитиб қўйиш саналади. Яна расмий никоҳдан ҳам ўтишни унутмангки, бу никоҳнинг мустаҳкам бўлишида муҳим аҳамият касб этади. Валлоҳу аълам!