Уйланиш истаги ота-онага қандай айтилади? 09.09.2015
Савол:Aссалому алайкум. Бир дўстим илтимоси билан савол йўлламоқдаман. Дўстим 22 ёшда. Уйланишга ҳар томонлама тайёр. Лекин унинг ота-онаси ҳали ёшсан, деб уйлантиришмаяпти. Дўстим ота-онасидан уялиб: “Уйлантириб қойинглар!” деб айтолмайди. Дўстим намозхон бола. Ҳаромга кетиб қолишдан жуда қўрқяпти. Ота-онаси 25 ёшингда уйланасан, дейишаётган экан. Бу ҳолатда қандай йўл тутиш керак?
Булим Одоб-ахлоқ5561
Dа алайкум aссалом. Шариатда уйланишнинг ҳукми кишининг жисмоний қуввати, оила мустаҳкамлигини таъминлай олишига қараб турлича бўлади. Жумладан, уйланишга, оилани боқишга имкони бор ва хотинга зулм қилмайдиган, эркаклик бурчини адо қила оладиган, уйланмаса, зинога қўл уриши аниқ бўлган, зинодан сақланишнинг бошқа йўлларини топа олмаган кишининг уйланиши фарз. Бундай кишилар уйланмай юрсалар қаттиқ гуноҳкор бўладилар. Демак, балоғатга етган, жинсий ҳаётга тайёр ва оиласини боқишга лаёқатли бўлган йигитнинг уйланиши лозим. Уни узрсиз кечиктириш жоиз эмас.
Агар сизнинг уйланишга рағбатингиз кучли ва моддий имконингиз бўлса, у ҳолда уйланиш истагини ота-онангизга ўзингиз эмас, ёши каттароқ кишилар ё бўлмаса амаки ва тоғаларингиз орқали билдиришингиз мумкин. Уларнинг гапи билан ота-онангиз фикрларини ўзгартириб, ҳолатингизни тўғри тушунишса, ажаб эмас.
Бундай вазиятда икки тараф бир-бирига инсоф қилиши лозим. Аввало, ота-оналар зийракроқ бўлиб, фарзандлари оила қуришга тайёр бўлиши билан уларни уйлаб, кўнгилни хотиржам қилишлари яхши. Орзу-ҳавас, ортиқча матоҳларни деб фарзандни уйли-жойли қилишни ортга суриш тўғри эмас.
Хуллас, бунда аввало, ният холис қилинади, ҳаром ишлардан тийилиш мақсадида уйланиш кўнгилга тугилади, Аллоҳга таваккул қилинади, ота-она ҳақига яхшилик сўраб дуо қилинади, орага ёши катта кишилар воситачи сифатида қўйилади. Агар бирон сабаб билан тўй ортга сурилса, у ҳолда шаҳватни сўндириш учун кўпроқ нафл рўза тутиш тавсия этилади. Тавфиқ Аллоҳдандир!