Ва алайкум ассалом. Ўша интернет сайти бу маълумотни қаердан олган экан? Унинг далили асослими? Охиратда жаннатга дохил бўлган бандага покиза жуфтлар берилиши Қуръони каримда зикр қилинган. Аммо уларнинг адади қанча бўлиши Аллоҳгагина аён. Тўғри, Қуръони каримда, ҳадиси шарифларда баён қилинган ғайб нарсаларга шубҳасиз имон келтирамиз. Аммо жаннат неъматлари, у ердаги ҳаёт ҳақида турли гаплар айтиш дуруст эмас. Жаннатни қўлга киритсак, у ерда жуда кўп неъматларга эришамиз. Жаннатдаги ҳаёт ҳақида тортишиш, жаннатни сўрашда ғулувга кетиш яхши эмас. Расулуллоҳ соллаллоҳу алайҳи ва саллам поклик ва дуода ғулувга кетишдан қайтарганлар. 

عَنْ أَبِي نَعَامَةَ أَنَّ عَبْدَ اللهِ بْنَ مُغَفَّلٍ رَضِيَ اللهُ عَنْهُ سَمِعَ ابْنَهُ يَقُولُ: اللَّهُمَّ إِنِّي أَسْأَلُكَ الْقَصْرَ الأَبْيَضَ عَنْ يَمِينِ الْجَنَّةِ إِذَا دَخَلْتُهَا فَقَالَ :أَيْ بُنَيَّ سَلْ اللهَ الْجَنَّةَ وَتَعَوَّذْ بِهِ مِنْ النَّارِ فَإِنِّي سَمِعْتُ رَسُولَ اللهِ صَلَّى اللهُ عَلَيْهِ وَسَلَّمَ يَقُولُ: إِنَّهُ سَيَكُونُ فِي هَذِهِ الأُمَّةِ قَوْمٌ يَعْتَدُونَ فِي الطَّهُورِ وَالدُّعَاءِ. رَوَاهُ أَبُو دَاوُدَ وَابْنُ مَاجَهْ وَأَحْمَدُ وَعَبْدُ بْنُ حُمَيْدٍ وَالْبَيْهَقِيُّ فِي السُّنَنِ الْكُبْرَى وَسَنَدُهُ صَحِيحٌ. 

   Абу Наомадан ривоят қилинишича, Абдуллоҳ ибн Муғаффал ўғлининг: “Эй Аллоҳ, мен жаннатга кирсам, Сендан жаннатнинг ўнг томонидаги оқ қасрни сўрайман!” деб дуо қилаётганини эшитиб, “Эй ўғлим, Аллоҳдан жаннатни сўра, У Зот жаҳаннамдан паноҳ беришини тила. Зеро, мен Расулуллоҳ соллаллоҳу алайҳи ва саллам: “Албатта бу умматда поклик ва дуода ҳаддидан ошадиган бир қавм бўлади”, деб айтганларини эшитганман”, деди (Абу Довуд, Ибн Можа, Аҳмад, Абд ибн Ҳумайд, Байҳақий ривоят қилган. Ривоят санади саҳиҳ). 
     Покликда ҳаддан ошиш аъзоларни уч мартадан кўп ювиш, таҳорат, ғусл ва нопок нарсаларни поклашда сувни исроф қилишдир. Дуода ҳаддан ошиш эса мумкин бўлмаган нарсаларни сўраш, овозни баланд кўтариш, қичқириш, пайғамбарлар мақомини сўраш ва ҳоказо. Имом Ғаззолий “Иҳё”да дуода ҳаддидан ошиш дуони қофияга солиб, худди шеърга ўхшатиш эканини айтган. 
    Унутмайлик, аёллар ҳуқуқини юқори кўтарган Исломдан бошқа дин ва тузум бўлган эмас. Аёллар ҳуқуқи мана шу ўткинчи дунёда бузилмаган экан, охиратда ҳам шундай бўлиши аниқ. Сиз у ёғидан хавотир олманг. Агар Аллоҳга тақво қилсангиз, шариатда буюрилган ишларни қилиб, қайтарилганлардан қайтсангиз, минглаб, ҳатто миллионлаб бетавфиқ эркакдан афзал саналасиз. Масаланинг бу томонини ҳам ёддан чиқармаслик керак. Кейин, жаннатдаги ҳаёт ҳақида ортиқча баҳслашиш, ҳар хил мулоҳазалар қилишдан кўра жаннатга кириш ҳаракатида бўлсак, тўғри қилган бўламиз.