Жума куни туғилган қизлар нуқсонли бўладими? 14.07.2016
Савол:Aссалому алайкум, қори ака! Қизим охирги кунларда мазаси бўлмай кўп йиғлайдиган бўлиб қолди. Ҳар хил дардларга чалинмокда. Уйдагилар домлага олиб бориб дам солдириб келишди. Домла Ёсин сурасини ўқиб дам солибди. Сўнгра бир хўроз сўйиб қонини қизимнинг баданига суртишни айтибди. Қонни баданга суртиш тўғрисида маълумот беришингизни илтимос қиламан! Ундан ташқари, қизим жума тонгида дунёга келган. Эшитишимча, жума куни дунёга келган қизлар бокира бўлмас эмиш. Шу тўғрида ҳам маълумот берсангиз! Жавоб учун олдиндан раҳмат!
Булим Ақида17318
Ва алайкум ассалом. “Домла” сўзи омма халқ орасида жуда урф бўлган ва аралаш-қуралаш ҳолда ишлатиладиган бўлиб қолган: масжид имоми ҳам домла, фолбину азайимхон ҳам домла... Қизингизнинг мазаси бўлмаса, шифокорларга кўрсатинг. Агар руҳий тарафдан касал бўлса, унда ҳам мутахассис шифокорларга кўрсатиш ва шу билан бирга шариатга мувофиқ дам солиш керак. Қўлингиздан келса, ўзингиз дам солинг. Бўлмаса, ишончли, эътиқоди мустаҳкам ва тақволи кишиларга, масжид имомларига олиб бориб дам солдиринг. Домла экан, деб дуч келган одамнинг олдига чопиб бораверманг! Хўроз сўйиб, уни бола танасига суртиш шариатда йўқ. Ношаръий ишни буюрибди ўша одам.
Жума куни туғилиш ва вафот этишнинг фазилати бўлиши мумкин. Аммо жума кунида туғилган бола бирон нуқсонли бўлишини биринчи марта эшитиб турибмиз. Жума куни туғилса, ундай бўлади, жума куни туғилса, мана бу исмни қўйиш керак... Ҳаммаси ўйлаб топилган нарсалар.
Шариатда банданинг ўзига боғлиқ бўлмаган нарсада унга зулм қилинмайди. Яъни, кимнинг қайси жойда, қайси йилда ва кунда туғилиши ўзига боғлиқ эмас. Шундай экан, бунда фалон кунда туғилса, бахтсиз бўларкан, касалманд бўларкан, дейилмайди. Банданинг бахтли ёки бахтсиз бўлиши, аввало Аллоҳ тақдирига, қолаверса, банданинг амалига боғлиқ.