Қуръон ёдлаш учун неча марта такрорланади? 15.08.2015
Савол:Ассалому алайкум, муҳтарам Одилхон қори ака. Сизнинг Қуръонни тўла ёд олганингизни ва бир пайтлар хатмларга ўтганингизни биламиз. Сиздан баъзи тавсияларингизни бизларга ҳам илинишингизни илтимос қиламиз. Ҳозирда имкон қадар Қуръондан ёдламоқдаман. Ёд олишда кенг тарқалган услуб, яъни бир бетни 3 га тақсимлаб, ўша қисмларни 100 тадан саноқ қиляпман. Кейин ўша бетни 2 га тақсимлаб, уни ҳам 100 тадан саноқ қиляпман. Охирида бир бетни 100 тадан саноқ қилиб такрорлаяпман. Қуръонни такрорлашда яна қандай самарали усуллар бор. Мана шу ҳақидаги тавсияларингизни ва шахсий тажрибангизни бизларга ҳам таълим берсангиз. Аллоҳ таоло сизга кўп яхшиликларни ато қилсин!
Булим Маслаҳат7302
Ва алайкумус салом. Қуръони каримни ёд олишнинг бир қанча усуллари бор. Бунда ҳар бир толиби илмнинг қобилияти ва ёд олиш салоҳиятига қаралади. Илк босқичларда бир саҳифани икки-учга бўлиб ёд олиш афзал. Кейинроқ ёдлаш қобилияти очилгач, бир саҳифани, ҳатто икки-уч саҳифани бир ҳаракатда такрор қилиб ёдлаш мумкин.
Такрор қилиш миқдори ҳақида тўхталадиган бўлсак, агар ёд олувчининг ёши 20 дан кичик бўлса, 300 марта такрорлаш кифоя қилади. Агар 20 дан катта бўлса, у ҳолда 500 марта такрор қилиш билан Қуръони каримни мукаммал ёдлаш мумкин.
Қуръони каримни ёдлагандан кейин уни мунтазам қайтариб туриш керак. Чунки такрорлаб турилмаса, хотирадан кўтарилиши мумкин. Зеро, набавий ҳадисда айтилишича, Қуръон боғлаб қўйилган туядан-да қочувчи, хотирадан кўтарилувчидир. Валлоҳу аълам!