“Ал-Ворис” исмининг маъноси нима? 30.09.2015
Савол:Ассалому алайкум, ҳурматли Одилхон қори ака. Маълумки, ворис деганда, меросхўрни тушунамиз. Лекин Аллоҳ таолонинг гўзал исмлари ичида “Ал-Ворис” исмининг маъносини китоблардан ўқиб, яхши тушунмадим. Аллоҳ қандай қилиб меросхўр бўлади. Ахир У беҳожат Зот-ку?! Шунинг учун, ўзингиз шу ҳақида маълумот берсангиз. Аллоҳ барчамиздан рози бўлсин!
Булим Ақида5335
Ва алайкум aссалом. Аллоҳ таолонинг “Ал-Ворис” исми, барча махлуқотлар ўтиб кетганидан кейин ҳам боқий қолувчи Зот маъносини англатади. Аллоҳ таоло шундай деган: “Шак-шубҳасиз, Биз Ўзимиз бу ерга ва ундаги бор жонзотга меросхўр бўламиз (яъни, барча жонзотлар ўтади, Ёлғиз Аллоҳ қолади). Ва фақат Бизгагина қайтадилар” (Марям сураси, 40-оят).
Бошқа ўринда шундай дейилган: “(Ер) юзидаги барча жонзот фонийдир. Буюклик ва карам Соҳиби бўлган Парвардигорингизнинг юзи – Ўзи мангу қолади” (Ар-Раҳмон сураси, 26-27-оятлар). Демак, Аллоҳнинг “Ал-Ворис” исми боқий қолувчи, ҳеч қачон ўлмайдиган Зот маъносини англатади. Бу исмда, “кимдандир мерос олувчи” маъноси йўқ. Зеро, Аллоҳ махлуқотларидан Беҳожат Зотдир.
