Ва алайкум ассалом. Инсон амали масаласида турли тоифалар қараши ҳар хил. Жумладан, қадария ва мўътазилия мазҳабидагиларга кўра, инсон ўз амалини ўзи яратади. Бунга Аллоҳ аралашмайди. Жабрия мазҳабидагилар эса, бунинг аксини айтишган. Уларга кўра, банданинг ихтиёри ўзида эмас, ҳамма нарсани иложсизликдан, Аллоҳ уни мажбур қилганидан бажаради.
    Иккала тоифанинг гапи нотўғри. Энг тўғриси Аҳли сунна вал жамоа маҳзаби тутган йўлдир. Унга кўра, банданинг амалини Аллоҳ яратади. Аммо нима амал қилиш инсоннинг ўзига боғлиқ: хоҳласа, савобли ишни қилсин, хоҳласа, гуноҳга ботсин. Қилар ишни қилиб қўйиб, “Аллоҳ мажбурлагани учун шундай қилдим”, деган кимса бекор айтибди.
    Хуллас, амални Аллоҳ яратади, аммо қандай амал қилишдаги ихтиёр банданинг ўзига берилган: истаса, имон йўлидан юрсин, хоҳласа, куфр йўлини танласин. Мана шу нозик жиҳатни яхши тушуниб олиш керак.