Лайлатул қадр вақти нима сабабдан аниқ айтилмаган? 17.06.2016
Савол:Асалому алайкум Устоз Одилхон қори! Рамазон ойида Лайлатул қадр кечаси борлиги барчамизга маълум. Лекин нима учун бу кечанинг аниқ вақти сир тутилган? Жавобингиз учун раҳмат!
Булим Ақида5251
Аллоҳ таоло Лайлатул қадр минг ойдан афзал эканини Ўз Каломида баён қилган. Аммо мазкур туннинг вақти аниқ айтилмаган. Бу борада қирққа яқин қавллар бор. Тўғри, Қадр кечаси 27-тунда экани ҳақидаги ривоятлар машҳур. Аммо бу ҳам қатъий эмас. Бу муборак тун вақтининг махфий тутилишидан ҳикмат нима, дейиладиган бўлса, бандалар бир тунга ишониб қолиб, бошқа тунларни беэътиборлик билан ўтказмасликларидир, десак хато бўлмайди. Агар Лайлатул қадр вақти маълум қилинганида, одамлар фақат ўша тунда ибодат қилиб, бошқа вақтларда бекорчи ишларга шўнғир, минг ойлик ибодат савоби ҳақидаги ваъда уларни ғурурга (салбий маънодаги хотиржамликка) кетказган бўлардилар. Шу сабаб ҳам уламолар, аввалда ўтган саҳобалар, жумладан Абдуллоҳ ибн Масъуд розийаллоҳу анҳудек зотлар Лайлатул қадрни йил бўйи қидириш кераклигини айтишган. Меҳрибон Пайғамбаримиз саллаллоҳу алайҳи ва саллам умматга енгиллик яратиш мақсадида Рамазоннинг охирги ўнлигида, аниқроғи унинг тоқ тунларида Лайлатул қадрни қидиришни тавсия этганлар.