Уйлангандан кейин аёлининг ўтмишда қилган гуноҳи фош бўлса нима қилиш керак? 26.08.2015
Савол:Аввало, сизларни бу қилаётган хайрли ишларингиздан Аллоҳ рози бўсин. Бу саволни беришдан кўп андиша қилиб юрдим. Ахийри, барибир сўрашга мажбур бўлдим. Аёлим ҳомиладор 6 ойли аммо ўтмишда қилган гуноҳи яқинда ошкор бўлиб бутун оилам, ота-онам, ҳаммани нафратига учради ва мен ҳам уша хиёнат, ёлғон учун "талоқсан,сени талоқ қилдим "деб талоқ бердим. Орадан вақт ўтиб, сайтингизда Ражъий талоқ ҳақида ўқидим ва сизга савол бердим. Мен берган талоқ ражъий талоқ эканлиги ва бинобарин, аёлимга қайтишим мумкинлигини айтингиз. Унга раҳмим келиб ёрдам қилиш мақсадида қайттим. Ҳозир у бошқа уйда яшайди. Мен бориб тураман. Лекин ҳеч кимга билдирмай. Чунки, оилам ундан нафратланади. Шу кунларда оилага келин керак деб бир оилани қизини топишди. Ибодатли, Аллоҳни таниган оила. Улар тўйга рози, аммо мен қийин аҳволдаман. Нима қилай, нима қилсам тўғри бўлади? Ҳозир бу қиз мени умуман яшамаслигимни билади. Бориб турганимни билмайди ҳеч ким. Бу ҳол давом этса, бу қизга нисбатан ноҳақли қилган ёки ёлғон билан ҳаёт бошлаган бўлмайманми? Балки аввалги аёлимга яна талоқ бериб, сўнгра бу қизга уйланишим керакми? Агар шундай бўлса ҳозир яна талоқ берсам у аёлга бошқа қайта олмайманми? Агар кейинчалик, уйланмоқчи бўлаётган қизни тўйдан кейин тушинтириб ундан болам бор деб рози қилсам ота-онамни рози қилсам бошқаттан никоҳ ўқитсам бўладими? Ёки у бошқасига турмушга чиқиб, ажрашганда мумкинми? Сизларни бу савол билан қийин вазиятга солган бўлсам, узр. Аммо ёрдамиз керак. У аёл ҳомиладор. Яқинда ундан болам бўлади аммо талоғини бермасам ҳозир бошқасига ноҳақли қиламан ва ота-онамни норози қиламан. Агар ҳозир талоқ бериб ўзим янги оила қуриб орадан 2-3 йил ўтиб ву кейинги аёлимни ота-онамни, балки ҳаммани кўндириб, тушунтириб, балки яна никоҳимга оларман десам, унда никоҳ мумкин бўлмасачи, деб ўйлайман. Агар бу никоҳни беркитиб яна бошқасига индамай уйланиб яшаб кетсам бу ёлғон очилса катта жанжал бўлиб, ҳаётим янаям қийинлашиб кетадими, деб ўйлайман. Иложи бўлса қандайдир тўғри йўл кўрсатинглар. Олдиндан раҳмат.
Булим Оилавий6300
Аллоҳ таоло сизга ўз ҳузуридан яхшилик ва саодат насиб айласин. Ҳаёт қийинчиликларини енгишда сабр-тоқат ва матонат берсин! Албатта, зино ва хиёнат улкан гуноҳлигида ҳеч қандай шубҳа йўқ. Бу ишнинг шахс ва жамият ҳаётига етказадиган салбий таъсирлари, тарбиявий офатлари ҳам мудҳиш даражада. Аммо, киши мазкур ишдан қайтиб, тавба қилган бўлса, у билан ҳаётни давом эттиришга нисбатан шариатимизда ҳеч қандай монеълик йўқ. Агар аёлингиз аввал шу ишни қилиб, сиздан яширган бўлса, ва кейин бу иш фош бўлган бўлса, у билан бирга ҳаётингизни давом эттирсангиз ҳам ёки жавобини бериб, қонуний ажрашсангиз ҳам ўзингизнинг ихтиёрингиздаги иш. Аммо, аёлингиз мазкур ишдан тавба қилган бўлиши мумкин. Боз устига ҳомиладор ҳам экан. Агар бу ҳолатда уни ташлаб кетсангиз аввалги ишлар гирдобига итариб юборгандек бўлиб қолмайсизми, деган андишага ҳам боради киши. Туғилажак фарзандингизнинг тарбияси ҳам сизсиз намунали бўлиши қийин масала. Аллоҳ таоло Қуръони каримда: “Балки, сизлар бир нарсани ёмон кўрарсиз. Ҳолбуки, ўша ишда Аллоҳ сизлар учун кўп яхшиликлар пайдо қилар”, дея зоҳирда ёқимсиз бўлиб кўринган кўп ишларга сабр қилинса, унинг ортидан кўп яхшиликлар келиши мумкинлигига ишора қилади. Ота-онанизга шу нарсани тушунтиринг. Бизнингча, бўлажак оилангиз ҳақида эмас, кўпроқ ҳозирда мавжуд бўлган оилангиз ҳақида қайғуришингиз мақсадга мувофиқроқ бўларди. Агар аёлингизга икки марта талоқ берган бўлсангиз, яна у билан никоҳланишингиз мумкин. Аммо, бир лафзда уч талоқ дейишдан сақланиш керак. Акс ҳолда, бирйўла учталоқ тушиб, кейин мазкур аёл бошқа оила қуриб, ундан ажралмагунча аввалги эрига қайтиши мумкин бўлмай қолади. Ўзи умуман талоқ масаласига енгилтаклик билан қараш нотўғри. Валлоҳу аълам!
