Ваалайкум ассалом. Ҳа, қизболага Осиё исмини қўйса бўлади. Осиё сўзининг қаердан келиб чиққани ва қандай маъноларга далолат қилиши борасида бир қанча фикрлар бор. Қуйида мазкур сўзнинг маънолари ҳақида айтилган фикрлар билан танишамиз:

1. Юнончадан олинган бўлиб, қуёшли, ҳавоси мусаффо ва иқлими ёқимли ўлка деган маънони англатади. Қадимда Юнонлар бу номни Осиё қитъасига берганлар;

2. Форсчадан олинган деган фикрлар ҳам бор. Шунда тегирмоннинг тоши деган маънони англатади. Осиё қитъасининг шакли тегирмон тошига ўхшатилган, шу боис мазкур ном берилган;

3. Пойдевори мустаҳкам, деворлари пишиқ бино;

4. Арабчадан олинган ва ҳамдард бўлувчи аёл маъносини англатади;

5. Миср фиръавнининг хотини Осиё бинти Музоҳим. Бу аёл ниҳоятда фазилатли бўлган. Мусо алайҳиссаломни гўдаклик чоғида сувда оқиб келганда ҳимоя қилиб, боқиб олган. Кейинчалик У зотнинг даъватларига эргашиб, ҳидоят топган. У бутун вужуди билан Аллоҳга иймон келтирган эди. Ҳатто ўша вақтда унинг золим эри бунга тиш-тирноғи билан қарши бўлса ҳам, азоблаш билан таҳдид қилса ҳам тўғри йўлдан қайтмаган. Набий алайҳиссалом бир ҳадисларида бу аёлни комил бўлган аёллар сирасида зикр қилганлар. Имом Бухорий ва Имом Муслим ривоят қилган ҳадиси шарифда шундай марҳамат қилинади (маъноси): “Эр кишилардан кўплар комилликка эришганлар, аёллардан эса фақат Имрон қизи Марям, фиръавн хотини Осиё комилликка эришган. Ойишанинг бошқа аёллардан устунлиги худди сариднинг бошқа таомлардан устунлиги кабидир”. Сарид бу арабларда жоҳилият давридан бошлаб то ҳозиргача машҳур бўлган таом туридир. У соддароқ қилиб тушунтирадиган бўлсак, нон бўктирилган шўрва бўлиб, Набий алайҳиссаломга ниҳоятда маҳбуб бўлган.