Ва алайкум ассалом. Ухлаб ётган одам устидан хатлаб ўтишга тўғри келса, бунинг ҳечқиси йўқ. Фақат унга халақит берилмаса, безовта қилинмаса бўлди. Агар оёғи устидан ўтса, касали ёки оғирлиги юқиб қолади, деган гап йўқ. Бу, одамлар ўзи ўйлаб чиқарган нарса, яъни, ирим-сиримдан, бидъат-хурофотдан бошқа нарса эмас.

Анас ибн Молик розияллоҳу анҳу Набий соллаллоҳу алайҳи ва салламдан ривоят қилади: “Касаллик юқиши ва шумланиш йўқ. Менга яхши фол – чиройли сўз ёқади” (Бухорий, Муслим, Абу Довуд, Термизий, Ибн Можа ва Аҳмад ривояти).

Имон-эътиқоди мустаҳкам банда ирим-сиримларга эътибор бермайди, ўз ишида давом этади. Аҳамият берсангиз, ирим-сирим, бидъат-хурофотларга ишонадиган кишиларнинг кўп қисми илмдан бехабар, ақида масалаларини яхши билмаслиги кўринади. Бундан чиқди, илм олиш, қалбни иллатлардантозалаш керак. Шунда асоссиз нарсаларга ишониб юрилмайди, фойдасиз ишлар билан овора бўлинмайди (Манба: “Бидъат-хурофотлар ислоҳи”).