Ҳомиладор аёл намозни қазо қилса бўладими? 04.10.2015
Савол:Ассалому алайкум, устоз. Аввалги саволимни эътиборсиз қолдирмасдан жавоб берганингиз учун сизга катта раҳмат! Яна битта саволим бор эди: ҳозир кўзим ёришига оз қолган. Беш вақт намозимни ўқишим қийин бўляпти. Фақат бомдодни ўқисам қабул бўладими ёки кўзим ёригандан кейин қазосини ўқиб, ибодатларимни давом эттиришим керакми? Шу ҳақида маслаҳат берсангиз. Жавоб учун олдиндан раҳмат!
Булим Ибодат масалалари4483
Ва алайкум ассалом. Аввало, Аллоҳ таоло сизга оқ йўл берсин, динига, миллатига фойда келтирувчи солиҳ фарзандлар ато этсин!
Ҳомиладорлик намозни қазо қилишга сабаб бўлмайди. Юкли аёл имкони етганича, қодир бўлганча намоз ўқийди. Агар туриб ўқишга қийналса, ўтириб ўқийди. Имрон ибн Ҳусойн розияллоҳу анҳудан ривоят қилинади: “Менда бавосир касаллиги бор эди. Набий соллаллоҳу алайҳи ва салламдан намоз ҳақида сўраганимда, у зот: “Тик туриб намоз ўқи. Агар қодир бўлмасанг, ўтириб, (бунга ҳам) қодир бўлмасанг, ёнбошлаб (ўқи)”, дедилар” (Бухорий, Абу Довуд ва Термизий ривояти).
Агар мусулмон, адолатли ва дин-диёнатли табиба туриб намоз ўқиш ҳомиладорнинг ўзига ёки ҳомиласига зарар етказиши мумкинлигини айтса, у ҳолда ўтириб намоз ўқийди. Агар ўтириб ҳам ўқиёлмаса, ёнбошлаган ҳолда ўқиса ҳам бўлади. Бироқ намозни тарк этмайди. Валлоҳу аълам!