Узоқ муддат фотиҳали юриш мумкинми? 22.09.2015
Савол:Фотиҳали ҳолда узоқ юришнинг ижобий ва салбий томонлари ҳақида ҳам тўхталиб ўтсангиз! Жавобингиз учун олдиндан катта раҳмат!
4588
Бисмиллаҳ, валҳамдулиллаҳ. Икки ёшга бахт тилаб фотиҳа қилинганидан кейин, тўйни имкон қадар тезлатиш керак. Чунки, шаръий никоҳ билан бир ёстиққа бош қўйиш хайрли иш. Яхши ишни кечиктирилмайди. Қолаверса, фотиҳа қилингач, орада 3-4 ойлаб вақт ўтиб кетса, йигит ва қиз, ҳатто қудалар орасидан гап-сўз ўтиши мумкин. Тўй кунини маълум қилиб қўйиб, никоҳ ўқитмасдан, икки ёш оила қурганини эл-юртга маълум қилмасдан юриш мана шундай оқибатларга олиб келади.
Орзу-ҳавас ўз йўлига. Биз биринчи галда ёшларнинг бахтини ўйласак, мақсадга мувофиқ бўлади. Чунки ҳозирги вақтда кўп ота-оналар тўй тараддуди билан овора бўлади, ёшлар ортиқча зеб-зийнатларга берилади. Натижада эътибор талаб этиладиган жиҳатларга бепарво қаралади. Айрим кўнгилсиз ҳолатлар мана шундан келиб чиқиши мумкин. Шунинг учун фотиҳа билан тўй орасини узайтириб юбормасдан, тезроқ халққа элон қилиб қўйилса, яхши бўлади.
Жуда узоқ муддат фотиҳали юриш, тўйни узрсиз кечиктиришнинг ижобий тарафи йўқ, деб биламиз. Фотиҳадан кейин тўй қанча тез ўтказилса, шунча яхши. Валлоҳу аълам!