Ва алайкум ассалом! Динимиз Ислом доимо одамларга адолат билан муомала қилишга буюради. Ҳатто бир кишини қайсидир хулқини ёмон кўрсак ҳам, ёки шахси бизлар учун ёқимсиз бўлган тақдирда ҳам унга муомала қилаётганда ҳақ-ҳуқуқларига риоя қилиб, адолат билан муомала қилиш лозим. Кимнидир ёмон кўришимиз унинг ҳаққини поймол қилиб, адолатсиз муомала қилишга йўл бериши мумкин эмас. Қуръони каримнинг кўп оятларида адолат қилишга буюрилади. Жумладан, Моида сурасининг 8-оятида: “адолат қилингиз! Зеро, бу тақвога яқиндир”, дея марҳамат қилинади. Тафсир улаомлари ушбу ояти каримани шарҳлар эканлар: яъни “эй мўминлар ким бўлишидан қатъий назар - хоҳ у дўстингиз бўлсин, хоҳ душманингиз бўлсин - барча инсонларга адолат билан муомала қилингиз! Зулм қилмангиз!” дея маъно берганлар. Пайғамбаримиз соллаллоҳу алайҳи ва саллам ҳам доимо адолатга чақирганлар, ўзлари ҳам одамларга шундай муоамала қилганлар. Ул зот соллаллоҳу алайҳи ва саллам ҳатто фарзандлар ўртасида ҳам адолат қилишга буюрганлар. Жумладан бир муборак ҳадисларида: “Аллоҳдан қўрқингиз ва болаларингиз ўртасида долат қилингиз!” деганлар.
     Юқорида зикр қилинганлардан ойдинлашадики, ҳамма бирбирига адолат билан муомала қилиши лозим. Қайнона келинларини бирини паст, бошқасини баланд кўриши ва шунга кўра бирига яхши иккинчисига ёмон муомала қилиши дуруст эмас. Балки, бу зулмнинг бир турига киради. Валлоҳу аълам