Чойни чап қўлда қуйса бўладими? 12.09.2015
Савол:Ассалому алайкум Одилхон қори ака, шу чой қуйиш хақида бир нарса сўрасам. Чойни чап қўлда қуйса бўладими, ё қуйиб бўлмайдими? Шу ҳақда жавоб берсангиз. Олдиндан раҳмат!
Булим Ижтимоий масалалар4966
Ва алайкум ассалом. Жирканилмайдиган, тубан саналмаган, ҳурматга далолат қилувчи барча ишларни ўнг томондан бошлаш Набий алайҳиссалом яхши кўрган одати шарифаларидан эди. Ўнг томондан бошлаш деганда бир қўл билан қилса бўладиган ишларни ўнг қўлда бажариш, масалан, таом тановул қилганда ўнг қўл ишлатиш, оёқда қилинадиган ишларни ўнг оёқда бошлаш, масалан, масжидга кираётганда ўнг оёқни муқаддам қилиш, шунингдек, поябзал кияётганда биринчи ўнг оёқдан бошлаб кийиш, сочни тараётганда тароқни бошнинг ўртасига қўйиб, аввал ўнг томонга юргазиш, кейин яна ўртасига қўйиб, кейин чап томонга тараш ва ҳоказолар тушунилади. Илло истинжо каби ишларда чап қўл ишлатилади. Ойиша разияллоҳу анҳо онамиздан ривоят қилинган ҳадиси шарифда шундай дейилади: “Набий соллаллоҳу алайҳи ва саллам оёқ кийимларини кийишда, соч тарашларида, покланишларида (таҳорат, ғусл ва ҳоказо) ва барча ишларида ўнг томон билан амалга ошириш ва ўнг томонни ишлатишни ёқтирардилар” (Бухорий ривояти). Шунга кўра, Расулуллоҳ соллаллоҳу алайҳи ва саллам яхши кўрганларидек ва У зотга эргашиш ниятида ҳамма ишларда ўнг томондан бошлаш, ўнг қўлни ишлатиш, шулар қаторида чойни ўнг қўлда қуйиш ҳам афзал ва мустаҳаб ҳисобланади. Агар шу ниятда қилса қўшимча ажр-савобларга эга бўлади, иншоаллоҳ. Аммо, бу фарз ёки вожиб эмас. Чап қўлда қуйса гуноҳкор бўлиб қолмайди. Валлоҳу аълам!