Ва алайкум ассалом. Сизга ҳам илиқ сўзлар ва яхши тилакларингиз учун ташаккуримизни изҳор қиламиз. Саволда айтилган ўлчамдаги тош (0,5см*0,5см) ярим сантиметрга ярим сантиметрлик ҳажмдаги тош бўлади. Бу жуда ҳам кичик тош. Бундай тошларга таяммум қилиш бизнинг наздимизда дуруст эмас. Негаки, унга икки қўлни зарб қилиш имкони йўқ. Маълумки тааяммумда икки қўл билан бир вақтда ерга ёки ер жинсидан бўлган нарсаларга масалан, қум, шағал қатлами, тош, оҳак, гипс каби нарсаларга уриб, кейин қўллар юзга суртилади ва яна бир марта зарб қилиб икки қўллар билаклари ва тирсаклари билан қўшиб суртилади. Сиз айтаётган тош жуда кичик тош. Баъзи фуқаҳолар тошни уёқ буёғини ўгириб, таяммум килинадиган аъзоларга суртишга рухсат берганлар. Аммо, шунда ҳам улар бу қадар кичик тошга рухсат бермаганлар. Бизнинг билишимизча, поездларда махсус хожатхоналар бор. У ерда таҳорат олса бўлади. Автомашина юрганигизда ҳам маълум жойларда тўхтаб намоз ўқиб олиш имкони топилади. Айниқса, ҳозирги кунимизда масжидлар сони жуда ҳам кўпайиб кетган. Излаган инсон имкон топади. Демак, сизнинг ҳолатингизда кичкина тошчага таяммум қилмасдан, ростмана таҳорат олиб, намоз ўқиганингиз маъқул, деб ҳисоблаймиз. Ёки жуда таҳорат қилиш имкони бўлмаса, каттароқ тошга таяммум қилишингизни ёхуд ўзингиз билан маълум миқдорда тупроқ олиб юришингизни маслаҳат берамиз. Валлоҳу аълам!