Касал аммам даволаниш учун ёрдам сўраяпти, аммо ўзимдан орттиролмаяпман? 28.08.2015
Савол:Ассалому Алейкум! Хурматли Одилхон Кори ака, ёшим 29 да. Аммамлар бир кассаликка чалиниб қолибдилар ва мендан моддий ёрдам сўраяптилар. Худога шукрки, топишим ёмон эмас, лекин рўзғорни ўзингиз биласиз, қанча бўлса кетаверади. Яқинда уйландим. Рўзғорни укам билан биргаликда тебратамиз. Ўзимдан ҳеч орттиролмаяпман. Лекин ёрдам қиламан деб ваъда бериб қўйдим. Ҳеч уддасидан чиқолмаяпман. Мана ҳозир ҳам пулим бору лекин жойи чиқиб турибди. Аёлимнинг кўзи ёрийдиган. Нима килай? Менга маслаҳат берсангиз. Буёги жигарчилик виждоним қийналиб кетяпти. Жавобингиз учун олдиндан раҳмат! Мухлисингиз
Булим Ижтимоий масалалар4465
Ва алайкум ассалом! Аллоҳ таоло аммангизнинг дардларига комил шифо берсин! Исломда силаи раҳм, қариндош-уруғларга ёрдам бериш қаттиқ таъкидланган ишлардан ҳисобланади. Иносн баҳоли қудрат ўзининг ёрдамга муҳтож бўлиб қолган яқинларига ёрдам қўлини чўзиши лозим. Бу қариндош-уруғлик ҳақларига киради. Шундай экан ўз шароитингиздан келиб чиқиб, имкон доирасида аммангизга ёрдам қилишингизни маслаҳат берамиз. Шароитингиздан эса ўзингиз кўпроқ хабардорсиз. Бундай ҳолатларда инсон ўзида бўлмаса ҳам ҳеч бўлмаса, бошқаларга илтимос қилиб, ўртада туриб ёрдам ҳосил қилишга сабабчи бўлса, шу ҳам ёрдам ҳисобланади. Агар аммангизга ёрдам қилишни астойдил хоҳласангиз Аллоҳ сизга йўл кўрсатишига ишончимиз комил. Боз устига аммангиз касал эканлар ва ёшлари ҳам катта бўлса керак. Муҳтож, бемор ва ёши улуғ инсонларга мурувват кўрсатиш ўта савобли ишдир.
