Дам солдириш ҳукми қандай? 15.07.2017
Савол:Ассалому алайкум. Домлага бориб, ўзини ўқитиш каби ишларга шариатимизда қандай қаралади? Бу ширк ҳисобланмайдими?
Булим Ижтимоий масалалар10224
Ва алайкум ассалом. Шариатимизда дам солдириш жоиз. Фақат бу шариат белгилаб берган чегарада бўлиши керак. Яъни, Қуръони карим оятлари ва саҳиҳ ҳадислар лафзлари билан араб тилида дам солиш, солинаётган дам фақат Аллоҳ изни билангина бандага фойда келтиради, деган эътиқодда бўлиш каби шартлар мавжуд.
Арабчани тўғри ўқий оладиган, илмли, етарли тажрибага эга мўмин банда дам солиши мумкин. Дам солдириш учун домлага – масжид имомига бориш шарт эмас. Аммо, кишининг ўзи арабчани билмаса, Қуръон ўқий олмаса, ишончли, бидъат-хурофотлардан узоқ, илм ва тақво йўлини тутган имом ёки бошқа олимларга дам солдириш жоиз. Шуни унутмайлик, мўмин-мусулмон банда учун жинлар билан ҳамкорлик қилувчи фолбин ва аррофлар ҳузурига бориш қатъиян мумкин эмас. Афсуски, мана шундай кўзбўямачилар ҳузурига дам солдиришга борувчилар кам эмас орамизда. Дам шариатга мувофиқ ҳолда солинмаса, орага бидъат-хурофот ва ширк амаллар қўшилса, бунинг зарари катта бўлади. Шу сабаб дам солдириш масаласида ўта эҳтиёткор бўлиш лозим.