Ва алайкум aссалом. Мусулмон одам урф-одатларда ғайридинларга ўхшашга интилиши яхши эмас. Шунингдек, намозга келадиган одамнинг либоси тоза, кенгроқ, қулай, авратини ёпадиган бўлиши талаб этилади. Агар имкони бўлса, бошкийим билан намоз ўқилгани яхши. Дангасалик ёки кибр сабаб бошяланг намоз ўқиш макруҳ саналади.
   Намозхон инсон сал эътиборлироқ бўлиши, қаерга келаётганини унутмаслиги, атрофидаги намозхонлар эътиборини тортмаслиги, беўхшов қилиқлари ёки кийиниши билан ажралиб турмаслиги мақсадгна мувофиқ.
   Лекин, ҳозирги кунда бутун дунёда умумий ва урфга кирган кийимлар кўпайиб кетган. Жумладан, пальто, куртка, костюм-шим ва ҳоказолар. Уларни мусулмонлар ҳам, бошқа дин вакиллари ҳам кияверадилар. Сиз саволда тилга олган капюшонли курткалар ҳам шу жумладандир. Бичими ўта тор-танқис бўлмаса, авратни беркитса ва шуҳрат ва одамлардан ажралиб олиш учун кийилмаса, бундай кийимларни кийиш жоиз. Кўчада ва ишда мазкур кийимларда юргандан сўнг, табиийки масжидга ҳам ўша кийимларда келишга тўғри келади. Зотан, динимиз Исломда ибодат учун махсус ибодат кийими йўқ. Юқорида айтилганидек, либос авратни беркитса, тор-танқис бўлмаса ва шуҳрат учун кийилмаса, уни кийганда ҳаммадан ажралиб қолинмаса, шунингдек турли нажосатлардан пок бўлса бундай кийимни намозда ва бошқа пайтда кийишнинг зарари йўқ. Чунки, юқорида тилга олинган кийимларнинг кўпи мусулмон юртларда ҳам урфга кирган. Либос, ўз вазифасини адо этса, материали ножоиз нарсалардан бўлмаса, масалан, эркаклар либоси ипакдан бўлмаса, аёлларнинг либоси каби ялтир-юлтир бўлмаса, уни ким қаерда ишлаб чиқарганлиги аҳамиятсиздир. Набий алайҳиссалом даврида либослар турли жойлардан келарди. Ва уларнинг ишлаб чиқарувчиларининг кўплари ўша пайтда мусулмон юртлари эмасди. Ул зот соллаллоҳу алайҳи ва саллам Ямандан келтирилган кийимларни киярдилар.
    Эҳтимол, сиз кўзингиз тушган кишилар алоҳида бош кийими йўқлиги учун ёхуд совуқлиги учун курткаларининг қалпоқларини кийиб олган бўлишлари ҳам мумкин. Шу боис бу ҳолат ҳақида бир нарса дейиш қийин. Аммо, барибир, одамларнинг эътиборини тортмайдиган шаклда, урфда мавжуд бўлган бош кийимлар билан намоз ўқиш афзаллигини эслатамиз.
     Намозхон либоси ҳақида мана бу манзилдан қўшимча маълумот олишингиз мумкин: http://muxlis.uz/uz/blog/1472