Ва алайкум aссалом. “Шайх” сўзи бир қанча маъноларни англатади. Жумладан, 1. “Кекса”, “соқолига оқ тушган”, “ёши улуғ”. 2. “Шаръий илмлар билимдони”. 3. Форс кўрфазидаги баъзи давлатларда сиёсий мақоми юқори бўлган шахсларга нисбатан ишлатиладиган сўз. 4. Илм ва мартабаси юқори шахс (“Шайхур раис” Ибн Синонинг лақаби, “Мамлакат шайхи” давлатни бошқаришда юқори мансабни эгаллаган шахс, “қабила шайхи” қабила бошлиғи, “аёлнинг шайхи” унинг эри).
    Бизда “шайх”, деганда шариат илмининг билимдони, тариқат пешвоси назарда тутилади. Тилимизда бу сўз “устоз” маъносида ҳам қўлланилиши мумкин. Муҳаддислар ҳадис эшитган ровийларини “шайх” деб аташган. Ҳадис илмида “икки шайх”, деганда Бухорий ва Муслим назарда тутилади. Бундан ташқари “икки шайх” дейилганда Абу Бакр ва Умар розияллоҳу анҳумолар ҳам кўзда тутилади.
    Шариат илмида донг таратиб, муносиб хизматлар қилган одам шайх мақомига кўтарилади. Аммо бу илмий унвон эмас. Уни бирон ташкилот маълум хизматлар учун бермайди. Балки, илм аҳлига нисбатан ҳурматан айтиладиган сўздир бу. Валлоҳу аълам!