Ва алайкум ассалом. Ҳа, бўлади. Омма мусулмонлар тилида таҳоратдан кейин ўқиладиган намоз шукри вузуъ намози, дейилади.

عَنْ عُقْبَةَ بْنِ عَامِرٍ الْجُهَنِيِّرَضِيَ اللهُ عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: مَنْ تَوَضَّأَ فَأَحْسَنَ الْوُضُوءَ ثُمَّ صَلَّى رَكْعَتَيْنِ يُقْبِلُ عَلَيْهِمَا بِقَلْبِهِ وَوَجْهِهِ وَجَبَتْ لَهُ الْجَنَّةُ. رَوَاهُ النَّسَائِيُّ وَسَنَدُهُ صَحِيحٌ.

    Уқба ибн Омир Жуҳаний розияллоҳу анҳудан ривоят қилинади: “Расулуллоҳ соллаллоҳу алайҳи ва саллам: “Ким таҳоратни чиройли қилиб, сўнгра қалби ва юзи билан юзланган ҳолда икки ракат намоз ўқиса, унга жаннат вожиб бўлади”, дедилар” (Насоий ривояти. Ривоят санади саҳиҳ).
     Қайси бир банда таҳоратни мукаммал қилиб, сўнгра хушу ва ихлос билан икки ракат нафл намоз ўқиса, унга жаннатга кириш вожиб бўлади. Қандай ажойиб мужда?!
    Банда таҳорат олгач, намоз ўқиш макруҳ ёки ҳаром бўлмаган пайт бўлса, икки ракат намоз ўқийди. Тонг отгандан бошлаб, қуёш бир найза миқдорида кўтарилгунча, қуёш тиккага келган пайт, аср намозидан сўнг то шомгача бўлган вақт оралиғида нафл намози ўқиш мумкин эмас. Лекин жума куни таҳорат қилгач, қуёш тиккага келган бўлса ҳам, (имом маъруза қилмаётган ёки Қуръон ўқилмаётган бўлса,) нафл намоз ўқиб олса бўлади. Валлоҳу аълам!