Жума куни ғусл қилмаса ҳам бўладими? 14.10.2015
Савол:Ассалому алайкум. Саволим қуйидагича: жунуб ҳолатда бўлмаса, жума намозига чиқиш учун ғусл қилмасдан таҳорат қилиб чиқса бўладими? Шошилинчда ёки вақт тиғиз бўлгани учун ғуслга имконият йўқ бўлиши мумкин? Шунда қандай йўл тутган афзал?
Булим Ибодат масалалари5449
Ва алайкум ассалом. Жунуб одам ғусл қилиши шарт. Сабаби, жунуб (нопок) ҳолда намоз ўқилмайди, масжидга кирилмайди, Мусҳафни қўлга олиб қироат қилинмайди.
Бизнинг ҳанафий мазҳабида (жунуб бўлмаган одамнинг) жума куни ғусл қилиши суннатдир. Самура ибн Жундуб розияллоҳу анҳу Расулуллоҳ соллаллоҳу алайҳи ва салламдан ривоят қилади: “Ким жума куни таҳорат қилса, нақадар яхши! Кимда-ким ғусл қилса, ғусл афзалдир” (Термизий, Доримий, Ибн Можа ва Аҳмад ривояти. Ҳадис санади саҳиҳ).
Демак, киши жунуб бўлмаса, жума намозига таҳорат қилиб чиқса ҳам бўлади. Лекин, иложи бўлса, ғусл қилгани афзал. Чунки, таҳорат билан маълум аъзолар покланса, ғуслда баданнинг ҳамма қисми покланади. Жума намозига ювиниб, тараниб, покиза либосларни кийиб бориш яхши одатдир.