Ва алайкум ассалом. Туришга қодир бўлмаган одам ўтириб намоз ўқиса бўлади. Жумладан, бемор стул ёки креслога ўтириб намоз ўқиши жоиз. Бунда оддий касаллик эмас, очиқ-ойдин кўриниб турган касаллик эътиборга олинади. Жумладан, ерга ўтирса, қайтиб ўрнидан туролмайдиган, турли сабаблар билан боши айланадиган, туриб ўқиса, касаллиги зиёда бўладиган беморларгина ўтириб намоз ўқишлари мумкин. 
    Маълумки, қиём, руку ва сажда намознинг фарзларидандир. Қодир одам бу арконларни тарк этмайди. Туриш, эгилиш ва сажда қилиш каби рукнлар фақатгина ожиз (мана шу ишларга қодир бўлмаган) одам зиммасидан соқит бўлади. Бундай ҳолатда руку учун бироз эгилади, сажда учун рукудан кўпроқ эгилади. Агар бунга ҳам қодир бўлмаса, имо-ишора билан намоз ўқийди. 
     Хуллас, бемор намозни (стул ёки ерга) ўтириб ўқиши мумкин. Аммо тан-жони соғ одам ўтириб намоз ўқимайди. Чунки, соғлом одам учун намоздаги қиём, руку ва сажда фарздир. Мазкур рукнларсиз намоз тўғри бўлмайди. Валлоҳу аълам!