Жавоб: Ва алайкм ассалом. Тишларни тўғрилатиш икки хил бўлади: 

1. Агар бундан мақсад чиройини янада зиёда қилиш бўлса, тишни тўғрилатиш жоиз эмас. 
Абдуллоҳ ибн Масъуд розияллоҳу анҳудан ривоят қилинади: “Аллоҳ вашм қилувчи аёлларни, вашм қилдирувчи аёлларни, мўйчинак ила тердирувчи аёлларни, тишлар орасини очтирувчиларни, ҳусн учун Аллоҳнинг яратганини ўзгартирувчиларни лаънатлаган! Менга нима бўлдики, Расулуллоҳ соллаллоҳу алайҳи ва саллам лаънатлаган кимсаларни лаънатламасам!? Бу Аллоҳнинг Китобида бордир” (Бухорий, Термизий ва Насоий ривояти). 

2. Агар хилқатидаги айб-нуқсонни тўғрилаш, хунук тишларни бироз ростлаш учун қилинса, жоиз. 

    Юқорида келтирилган ривоятда айтилганидек, ўша ишлар “ҳусн учун”, бировга чиройли кўриниш учун бўлса, қораланади. Сабаби бунда ҳожат бўлмаган ҳолатда Аллоҳ яратган табиий хилқатни ўзгартириш иллати бор. Аммо бирон зарурат юзасидан, масалан, хасталикни даволаш учун бўлса, жоиз. 
     

     Баъзи кишиларнинг тишлари қийшиқ, олдига бўртиб чиққан ёки тартибсиз ҳолатда бўлиши мумкин. Ана шу камчиликни тўғрилатса бўлади. Бироқ тўғри тишни янада чиройли қилиш учун турли усулларни қўллашга рухсат этилмайди. Валлоҳу аълам!