Ва алайкумус салом. Мусулмон банда шариат илмларини ўрганиши талаб қилинади. Ким мусулмон бўлса-ю, аммо илм олмасдан юрса, гуноҳ ишни билмай қилиб қўйса ҳам бу маъсият юки унинг бўйнидан соқит бўлмайди. Зеро, ўша банда илм олиши керак эди (ҳалол ва ҳаром нарсаларни билиб олиш ҳар бир мусулмон бандага фарзи айндир).

Мусулмон банда бирон гуноҳ содир этса, дарров тавбага шошилиши керак. Агар тавба қилмай вафот этса, қабрда ёки қиёмат куни гуноҳига яраша азобланади, кейин шафоат қилиниб, Аллоҳнинг марҳаматига дохил бўлиши мумкин.

Биз юқорида мусулмон, Аллоҳ ва охират кунига имон келтирган банда ҳақида гапирдик. Аммо кофир ва мушрик бандалар гуноҳ қилиб, ҳаётлари сўнггида қилмишларига пушаймон бўлсалар ҳам бунинг фойдаси йўқ. Сабаб куфр ва ширкнинг ўзи энг катта гуноҳ саналади. Улар барча гуноҳлари кечирилиши учун куфр ва ширкдан воз кечиб, имон келтиришлари керак. Шунда уларнинг аввал содир этган барча гуноҳлари мағфират қилинади. Валлоҳу аълам!