Ва алайкум ассалом! Имомга иқтидо қилинганда қилинадиган ва қилиш мумкин бўлмаган ёхуд қилмаслик афзал бўлган ишлар жуда ҳам кўп. Бу ҳақда билиш учун намозлик китобларга кўз югуртириш ёки фиқҳнинг намоз бўлимини ўқиш фойдадан ҳоли бўлмайди. Агар умумийроқ тарзда жавоб берадиган бўлсак, айтиш мумкинки, имомга иқтидо қилган киши рукуъ ва саждага кетишда, улардан туришда ва бошқа ўринларда имомга эргашиши лозим. Рукуъ ва саждага борганда шунингдек, улардан тураётганда имомдан олдинга ўтиб кетиш мумкин эмас. Зеро, имом олдинда турувчи деган маънони англатади. Шу боис унга эргашилади, лекин ундан олдинга ўтиб кетилмайди. Шунингдек, намоз ортиқча ҳаракат қилмасдан хушуъ ва хузуъ билан адо этилади. Кўп ҳаракат қилиб юборса намоз бузилиши мумкин. Фиқҳда бу “амали касир” деб аталади. Намозда намозга тааллуқли бўлмаган бирор ишни икки қўллаб бажарса, ёки бир қўллаб қилса ҳам бир рукнда икки-уч марта такрорласа, ёхуд нарироқдан қараган одамга намоз ўқимаётгандек бўлиб кўринувчи амалларни қилса, намозда гапирса, қаҳқаҳа билан кулса, намоз бузилади. (Қаҳқаҳа билан кулса, намоз ҳам, таҳорат ҳам бузилади.) Намозда инсон Аллоҳнинг ҳузурида турганлигини ёдда тутиши керак. Бинобарин, қалбини ҳар-хил дунёвий ўй фикрлардан ҳоли қилиб, фикрини жамлаши ва имом ўқиётган оятларга қулоқ бериб, сомеъ бўлиб туриши керак. Бизнинг ҳанафий мазҳабимизга кўра, имомга эргашган одам ичида фотиҳа ва зам сура ўқимайди. Балки, жаҳрий намоз бўлса, имомнинг қироатига қулоқ солади. Бордию намоз махфий бўлса, яъни суралар товуш чиқариб қироат қилинмайдиган бўлса, унда ҳам муқтадий киши (яъни имомга эргушувчи) ичида сура ўқимасдан тинглайди. Яъни жим туради. Демак, имомга иқтидо қилган одам ичида сураларни ўқимайди. Валлоҳу аълам!