Kurak suyagi harommi? 23.11.2017
Savol:Assalom alaykum. Ustoz mani bir savol qiynayapti shunga oydinlik kiritib bering iltimos. Qushxonalarda mol, quy suyaklarin orasidagi kurak suyagini (xarom kurak) deb atashadi va uni vaznini tarozdan ayrishadi. Shuni xarom yoki halol ekanligini tushntirib bersangiz.
Bo`lim12925
Va alaykumus salom. Haqiqatan, mol so‘yilib taroziga tortilayotganda kurak suyagi uchun ikki kilo olib tashlanadi. Lekin bu suyakning haromligi haqida biron dalil yo‘q. Bu narsa qassoblar orasida urf bo‘lgan ko‘rinadi. Nega, deb so‘ralsa, o‘sha suyakda ilik ham yo‘q, boshqa suyaklar kabi ovqatga solinsa, foydasi bo‘lmaydi. Uni taroziga tortib xaridorga sotish ma’qul sanalmaydi. Shuning uchun uni tarozidan chiqarib tashlansa kerak.
Ma’lumot o‘rnida aytib o‘tamiz, hanafiy mazhabi ulamolari nazdida jonliqning yettita qismi yeyilmaydi. Bular: 1. Oqqan qon. 2. Ikki moyak (tuxumdon). 3. Erkaklik olati. 4. Urg‘ochi hayvonning jinsiy a’zosi. 5. Bezlari. 6. Siydik pufagi. 7. O‘t pufagi.
Bu a’zolar orasida kurak suyagi yo‘q. Shundan ma’lum bo‘ladiki, kurak suyagi taroziga tushmagani bilan harom deyilmaydi. Zero, biron narsaning haromligiga odamlar orasida tarqalgan urf emas, Qur’on yoki sahih hadis dalil bo‘la oladi.