Ўзбекистонлик қори Саратов вилояти мусулмонлари билан Рамазон ойини ўтказиб келмоқда
2016 йил Россия Федерациясининг Саратов вилояти муфтийси М.Бибарсовнинг Дин ишлари бўйича қўмита номига йўллаган хатига асосан, ўзбекистонлик қори М.Ҳайдаров жорий йил Рамазон ойида таровеҳ намозларини ўтказиб беришлик учун Россиянинг Саратов вилоятига жўнаб кетди.
Саратов шаҳри марказида Саратов мусулмонлари диний идораси, “Рашида” жоме масжиди, “Шайх Сайид” мадрасаси, “Родник” хотин-қизлар жамоат ташкилоти марказлашган бинода фаолият олиб боради.
“Рашида” жоме масжидида 6 июнь кунидан бошлаб Рамазон ойи давомида таровеҳ намозларида Қуръони карим бошидан охиригача хатм этилмоқда. Ўтказилган таровеҳ ҳамда жума намозларида ўзбекистонлик қори намозхонларни чиройли Қуръон тиловати билан хушнуд этди.
Саратов мусулмонлари идораси томонидан мусулмон жамоасини бирлигини сақлаш, соф ислом таълимотларини етказишда олиб борилаётган шу сингари хайрли ишлари бугун ўз ифодасини топиб келаяпти дейилса, муболаға бўлмайди.
Россия ва Ўзбекистон мусулмонларини бирлаштириб турган тинчликсеварлик, бағрикенглик ва холис эътиқод каби қадриятлар бугунги кунда ҳам ҳамкорлик ришталарининг мустаҳкамлигини таъминлаб келмоқда.
Саратов вилояти муфтийси М.Бибарсов Рамазон ойида вилоятнинг чекка ҳудудларида жойлашган масжидларга қилган сафари мобайнида М.Ҳайдаров ҳамрохлик қилиб, жойларда таровеҳ намозларини адо этиб, Қуръони карим тиловати ва таровеҳ тасбеҳларини ўқиб бермоқда. Йиғилган намозхонларга Рамазон ойининг фазилатлари ҳақида маърузалар қилинмоқда.
Бугунги кунда ўзбекистонлик қориларнинг Россия, АҚШ каби нуфузли давлатларда Рамазон ойини муносиб тарзда ўтказиб келиши катта шараф, катта муваффақиятдир.