Малака ошириш курслари бошланди
Жорий йилнинг 4 январь куни Ўзбекистон мусулмонлари идораси тасарруфидаги диний таълим муассасалари маънавият ва маърифат масалалари бўйича мудир муовини ҳамда Халқаро терроризм ва диний экстремизмга қарши курашишнинг маънавий-маърифий асослари фани ўқитувчи-педагоглари учун ташкил қилинган малака ошириш курси машғулотлари бошланди.
Машғулотлар Имом Бухорий номли Тошкент ислом институтида бўлиб ўтмоқда. Дарс машғулотлари 46 соатга мўлжалланган бўлиб, 4 январдан 9 январгача давом этиши режалаштирилган. Маъруза ва амалий машғулотларга дарсларни юқори савияда олиб бориш учун Ўзбекистон Республикаси Президенти девони масъул ходимлари К.Комилов, Э.Ибрагимов ва Ш.Исломов, Ўзбекистон мусулмонлари идораси раиси ўринбосари Шайх Абдулазиз Мансур, Вазирлар маҳкамаси ҳузуридаги дин ишлари бўйича қўмита таълим бўлими бошлиғи Салоҳиддин Шерхонов, Миллий ғоя ва мафкура илмий-амалий маркази директори ўринбосари Ш.Тўраев, Миллий ғоя ва мафкура илмий-амалий маркази бош мутахассиси И.Даминов, Тошкент ислом университети проректори ва доцент ҳамда ТИИ ўқитувчиларидан ташкил топган етакчи мутахассислар жалб қилинган.
Дарсдаги маъруза ва амалий машғулотлар бугунги давр педагоги олдида турган долзарб вазифалар ва энг муҳим мавзулар бўйича танлаб олинган.