Бухорода “Тинчликни асраш - давр талаби” мавзуида йиғилиш бўлиб ўтди
2015 йил 10-11 декабрь кунлари Бухоро вилоятида “Тинчликни асраш - давр талаби” мавзусида тегишли ташкилот ва идораларнинг вакиллари билан йиғилишлар ҳамда давра суҳбатлари ташкил этилди.
Жумладан, 10 декабрь куни Бухоро ва Когон шаҳарлари, Бухоро, Жондор, Когон, Олот, Ромитан, Пешку, Қоракўл ва Қоровулбозор туманлари мутасадди ташкилот раҳбар-ходимлари, жамоат ташкилотлари вакиллари ҳамда имом-хатиблар иштирокида йиғилиш ўтказилди.
Мазкур йиғилишда “Мамлакатимизда диний экстремизм ва ҳалқаро терроризмга қарши курашнинг долзарб йўналишлари”, “Ислом - тинчлик дини”, “Тинчликни асраш ва тарғиб қилиш долзарб вазифа” мавзуларида маърузалар қилинди.
Уларда Ўзбекистоннинг халқаро миқёсда эришаётган ютуқлари, ижтимоий-иқтисодий, маънавий соҳаларда, шунингдек, аҳоли фаровонлигини ошириш борасида амалга оширилаётган ислоҳотлар, шу билан бирга, дунёда рўй бераётган воқеа ва ҳодисаларнинг минтақадаги давлатлар ва мамлакатимизга таъсири, ёшлар онгини эгаллашга қаратилган маънавий таҳдидлар, жумладан, диний экстремизм, ақидапарастлик, миссионерлик ва “оммавий маданият” каби иллатлар тарқалишининг салбий оқибатлари, бу борада таълим соҳаси, ёшлар масалалари билан шуғулланувчи ташкилот ва идоралар, маънавият тарғиботчилари, маҳалла ва жамоатчилик вакилларининг олдида турган долзарб вазифалар борасида сўз юритилди.
