БМТ Бош котиби Қуръондан иқтибос келтирди
Бирлашган Миллатлар Ташкилоти Бош котиби Антониу Гутерриш Яқин Шарққа сафари чоғида Қоҳира университетига ҳам ташриф буюрди. У ўз нутқида бугунги даврнинг асосий муаммолари ва мусулмонлар маданияти ва тараққиёти тўғрисида фикр билдирди.
“Қизиғи шундаки, қочоқларни ҳимоя қилишга қаратилган қонунлар Иккинчи жаҳон урушидан кейин қабул қилинган, бироқ мусулмонлар маданияти ва анъаналарида бу ҳуқуқ доим бўлган. Қочоқларни ҳимоя қилиш бўйича фикрни Қуръони каримнинг “Ат-Тавба” сурасида кўриш мумкин. Унда инсоннинг эътиқоди бор-йўқлигидан қатъий назар ҳимоя қилиниши кераклиги айтилган. Ким ҳозир Қуръонни танқид қилиб, динни бетоқатликда айблаётган бўлса, билиб қўйсинки, қочоқлар ҳимояси ҳақидаги биргина шу фикр, исломнинг бағрикенглик, бирдамлик ва инсонпарварлик дини эканини исботлаб турибди, – дейди Гутерриш.