BMT Bosh kotibi Qur’ondan iqtibos keltirdi
Birlashgan Millatlar Tashkiloti Bosh kotibi Antoniu Guterrish Yaqin Sharqqa safari chog‘ida Qohira universitetiga ham tashrif buyurdi. U o‘z nutqida bugungi davrning asosiy muammolari va musulmonlar madaniyati va taraqqiyoti to‘g‘risida fikr bildirdi.
“Qizig‘i shundaki, qochoqlarni himoya qilishga qaratilgan qonunlar Ikkinchi jahon urushidan keyin qabul qilingan, biroq musulmonlar madaniyati va an’analarida bu huquq doim bo‘lgan. Qochoqlarni himoya qilish bo‘yicha fikrni Qur’oni karimning “At-Tavba” surasida ko‘rish mumkin. Unda insonning e’tiqodi bor-yo‘qligidan qat’iy nazar himoya qilinishi kerakligi aytilgan. Kim hozir Qur’onni tanqid qilib, dinni betoqatlikda ayblayotgan bo‘lsa, bilib qo‘ysinki, qochoqlar himoyasi haqidagi birgina shu fikr, islomning bag‘rikenglik, birdamlik va insonparvarlik dini ekanini isbotlab turibdi, – deydi Guterrish.