Рўза ибодати фарз қилинган ой нима учун Рамазон деб аталади?
Рамазон ойи қамарий тақвимга кўра йилнинг тўққизинчи ойи саналиб, у Шаъбон ойидан кейин, Шаввол ойидан аввал келади. Биласизми, “Рамазон” сўзи қандай келиб чиққан?
Ушбу муборак ойнинг номи араб тилидаги “рамида” феълидан келиб чиққан бўлиб, “қайноқ, қизиган бўлиш” маъноларини билдиради.
Исломдан аввалги даврларда арабларда йил ойларини мавсум ва табиат ҳодисаларига боғлаб аташ одат бўлган. Рамазон ойи, яъни йилнинг 9-ойи айнан жазирама иссиққа тўғри келгани боис уни “Рамазон” дея аташган.
Ислом динининг келиши билан, Қамарий тақвим тўғриланиб унга ўзгартиришлари киритилгач, Рамазон ойи ёз ойига тўғри келмай қолган, лекин унинг аввалги номи сақланиб қолган.
Яна бир тахминга кўра, ушбу ном Рамазон ойидаги рўзадорнинг ҳолатидан келиб чиқиб қўйилган. Яъни, рўзадор кун давомида ташналик ва очлик ҳиссидан ўзида қизиш ва жазирама тафтини туяди,балки шу сабаб мазкур ой айнан Рамазон дея аталгандир.
Шу ўринда “рўза” сўзига ҳам тўхталиб ўтсак. “Рўза” араб тилида “савм”, “рўзадор” эса “соим” деб аталади. Ушбу сўзлар “сома” феълидан келиб чиққан бўлиб, феълнинг асли таржимаси “ўзини тийиш” маъносини билдиради. Яъни, рўзадор кун давомида ўзини нафақат ейиш ва ичишдан, балки, ёмон амаллар ва гуноҳлардан ўзини тияди.
Рамазон ойида барчамизга гуноҳлардан тийилиб, солиҳ амалларни кўпайтиришда ва Рамазон рўзасини мукаммал адо қилишда Аллоҳ мададкор бўлсин!