Йил давомида хонадонингиз баракага тўлишини истайсизми?
Биров сизга, «Агар атига бир кун вақт ажратиб, фалон ишни қилсанг, уч юз олтмиш беш кунинг барокатли, тўкин сочин ўтади», деса, ўша бир кунлик ишни жидду жаҳд билан қилишга уринасиз.
Айнан мана шу имконият динимиз таълимотида кўрсатиб қўйилган. Имом Табароний, Имом Байҳақий ва бошқа муҳаддислар ривоят қилган ҳадисда бу ҳақда шундай дейилган.
يُرْوَى عَنْ إِبْرَاهِيمَ بْنِ مُحَمًّدٍ بنِ المُنتَشِر، عَنْ أَبِيهِ أَنَّهُ قَالَ: "بَلَغَنَا أَنَّهُ مَنْ وَسَّعَ عَلَى أَهْلِهِ يَوْمَ عَاشُورَاءَ وَسَّعَ اللهُ عَلَيْهِ سَائِرَ سَنَتِهِ" قَالَ سُفْيَانُ بْنُ عُيَيْنَةَ: "جَرَّبْنَاهُ مُنْذُ سِتِّينَ عَامًا فَوَجَدْنَاهُ صَحِيحًا"
Иброҳим ибн Муҳаммад ибн ал-Мунташирдан, у киши отасидан ривоят қилиб айтадики:
“Бизга келган хабарга кўра, ким Ашуро куни оила аҳлига кенгчилик қилиб берса, Аллоҳ таоло унга йил давомида кенгчилик қилиб қўяди”. Суфён ибн Уяйна айтадилар: “Биз бу хабарни олтмиш йилдан бери тажриба қиламиз ва унинг тўғрилигини топганмиз”.
Келинг, азизлар, Ашуро куни аҳлимизга кенгчилик қилиб, йил давомида илоҳий баракадан баҳраманд бўлиб яшайлик!
Одилхон қори Юнусхон ўғли
