Усмон розияллоҳу анҳудан қолган 1400 йиллик боғни биласизми?
Ақл бовар қилмайди, лекин бу факт! Ислом динининг Расуллуллоҳ соллаллоҳу алайҳи васалламдан сўнгги учинчи халифаси Усмон ибн Аффон розияллоҳу анҳунинг ҳозирги кунга қадар Мадина шаҳрида вақф ерлари мавжуд. Бу Румаййо қудуғи ва шу ҳудуддаги хурмо боғи бўлиб, унинг мевалари ҳожиларга текин тарқатилади.
Ушбу қудуқни, аниқроғи, унинг “ярмини” Усмон ибн Аффон розияллоҳу анҳу ўз даврида мадиналик яҳудийдан сотиб олган. Яъни, шартномага кўра икки томон қудуқдан галма-галдан кун ора фойдаланишга келишиб олишган. Лекин кўп ўтмай яҳудий ўзига тегишли бўлган қисмини ҳам Усмон розияллоҳу анҳуга сотган. Негаки, Усмон ибн Аффон розияллоҳу анҳу ўзининг навбати бўлган кунда қудуқдаги сувни одамларга бепул улашади. Натижада бошқа кунлари қудуққа келмай қўяди.
Усмонийлар империяси даврида ҳукмдорлардан бири “Халифа Усмон қудуғи” атрофига 1500 та хурмо дарахти ўтказади. Хурмо меваларини сотишдан тушган фойда ҳам Усмон ибн Аффон розияллоҳу анҳунинг вақфи ҳисобланиб, маблағ Мадинадаги Пайғамбаримиз соллаллоҳу алайҳи васалламнинг масжидларига ўтказилган.
Қосимхон Бойханов