Va alaykum assalom. Biz muxlislardan kelgan har bir savolga hujjat-dalillar bilan batafsil javob berish imkoniga ega emasmiz. Sababi buning uchun ko‘p vaqt sarf etiladi. Biz nima aytayotgan bo‘lsak, uni Qur’ondan, hadisdan yoki ulamolar qavllaridan olamiz. Lekin, savollarga imkon qadar qisqa va lo‘nda javob berishni ixtiyor etganmiz.
   Endi bevosita savolingizga kelsak, musulmon kishi balog‘atga yetishi bilan kunda besh mahal namoz o‘qish zammasida farz bo‘ladi. Agar o‘qimasa, qattiq gunohkor bo‘ladi. Bu gunohni uning qazosini o‘qish bilan yuvish imkoni bor. Bir banda namoz o‘qib yurib, ma’lum muddatdan keyin uni tashlasa, namozning farzligini inkor etmasa, boshqa gunohlarni qilib yursa, uning iymoni bo‘lgani bilan dinning ustunlaridan bo‘lgan muhim amalni bajarmay yurgani uchun gunohkor sanaladi.
Unutmaylik, namozni tark etish oqibati og‘ir. Buning “kichik” jazosi qabr azobi ko‘rinishida bo‘lishi rivoyatlarda kelgan. Banda namozni qoldirishning oxiratdagi jazosi qandayligini tasavvuriga sig‘dira olmaydi.
     Shunday ekan, Dinning ustuni bo‘lgan namozni o‘z vaqtida, talab qilingan suratda o‘qish lozim.