Тошкент ислом институтида байрам тадбири бўлиб ўтди.
Жорий йилнинг 30 сентябрь куни “1 октябрь – ўқитувчилар ва мураббийлар куни” муносабати билан Тошкент ислом институтида “Устозларга таъзим” мавзусида тадбир бўлиб ўтди. Тадбирни институт ректори Уйғун Ғафуров очиб берди.
Институт устоз ва мураббийлари касб байрамлари билан Ўзбекистон мусулмонлари идораси раиси ўринбосари Шайх Абдулазиз Мансур ҳазратлари, Ўзбекистон Президенти девони масъул ходими Элдор Ибрагимов ва Дин ишлари бўйича қўмита таълим бўлими мудири Салоҳиддин Шерхоновлар табрикладилар.
Тадбирнинг бадиий қисмида институт талабалари ўзларининг ижодий ишлари билан чиқишлар қилдилар:
2 курс талабаси Роҳманбердиев Жобирхон устозлар фазилати ва уларни ҳурмат қилишга доир ҳадиси шарифлар ва уламоларнинг сўзларидан намуналар келтирди;
1 курс талабаси Нуриддинов Йўлдошбоев устозларни ҳурмат қилишга доир ўзбек халқ мақоллари ва ҳикматлари сўзларидан намуналар айтди;
3 курс талабаси Тоҳиров Сайдулло “Устозлар таъзим” номли ўз шеърини устозлар ҳузурига ҳавола қилди;
4 курс талабалари устозларни ҳурмат қилишни акс эттирувчи саҳна кўриниши намойиш этдилар.
“1 октябрь – ўқитувчилар ва мураббийлар куни” муносабати билан институт талаблари ўртасида “Устозлар фазилати ва уларни ҳурмат қилиш” мавзуси бўйича мақола ёзиш мусобақасида иштирок этиб ғолиб бўлган талабалар қимматбаҳо совғалар билан тақдирланди.
Институт катта ўқитувчилари ва фахрий устозларга қимматбаҳо совғалар топширилди. Талабалар томонидан тайёрланган учта хатми Қуръон савобларини Шайх Абдулазиз Мансур ҳазратлари институтда фаолият кўрсатган марҳум устозлари руҳларига бағишлаб, якуний дуо қилиб бердилар.
