“Тинчликни асраш-давр талаби” мавзуидаги туркум тадбирлар Самарқандда бўлиб ўтди
Жорий йилнинг 21-22 декабрь кунлари Дин ишлари бўйича қўмита раиси О.Юсупов ва Ўзбекистон мусулмонлар идораси раиси, муфтий У.Алимовлар томонидан Самарқанд вилоятида “Тинчликни асраш-давр талаби” мавзуси остида қатор маърифий-тарғибот тадбирларида маърузалар билан қатнашиб, учрашувларда иштирок этдилар.
Ушбу тадбирларда вилоят, шаҳар ва туман ҳокимларининг ўринбосарлари, Халқ таълими, Ўрта махсус, касб-ҳунар таълими бошқармалари, Маънавият тарғибот маркази, “Камолот” ЁИҲ, “Маҳалла” хайрия жамоат фонди, “Нуроний” жамғармаси вилоят ва шаҳар-туман бўлимлари раҳбарлари, жойлардаги олий ўқув юртларининг маънавият ва маърифат масалалари бўйича проректорлари, касб-ҳунар таълими муассасалари директорлари, маҳалла фуқаролар йиғинлари раислари ҳамда вилоятдаги барча имом-хатиблар иштирок этдилар.
Маърузачилар томонидан ўтказилган йиғилишларда “Мамлакатимизда диний-экстремизм ва халқаро терроризмга қарши курашнинг долзарб йўналишлари”, “Ислом – тинчлик дини”, “Тинчликни асраш ва тарғиб қилиш долзарб вазифа” “Ноқонуний миграцияни олдини олиш”, “Сохта тариқатчиликнинг салбий оқибатлари”, “Огоҳлик – давр талаби” мавзуларида маърузалар қилинди.
Учрашувда сўзга чиққан иштирокчилар тинчликни асраб-авайлаш, айниқса, ёшлар тарбиясига, уларни турли ёт оқимлар таъсирига тушиб қолишини олдини олишга барча маъсул эканлигини, бу ишларни ҳамжихатликда амалга ошириш кўзланган натижалар беришини таъкидладилар.
ЎМИ раиси, муфтий У.Алимов сафар Ургут туманидаги “Боғишамол”, Жомбой туманидаги “Исломобод”, Булунғур туманидаги “Амир Хамза” масжидларига ташриф буюриб, намозхонлар билан тинчликни асраш, унинг қадрига етиш, ёт ғояларга эргашмаслик, фарзанд тарбияси, огоҳлик мавзуларида суҳбатлар ўтказди.
Шунингдек, тадбир ва учрашувлар давомида ишчи гуруҳ аъзолари томонидан Ўзбекистон Республикаси Президенти И.Каримовнинг Конституция қабул қилинганининг 23 йиллигига бағишланган тантанали маросимдаги маърузасида қайд этилган вазифалар ва устивор йўналишларнинг мазмун-моҳияти баён этилиб, жамиятнинг турли соҳаларида аёлларга яратилаётган шароитлар, она-бола саломатлиги, ёш авлод камолоти учун берилаётган имкониятлар ҳақида айтиб ўтилди.
Хусусан, бугунги кунда юртимизда қиз болаларнинг – бўлғуси оналарнинг ҳам жисмоний, ҳам маънавий соғлом бўлиб вояга етиши, уларга таълим олишда кўмаклашиш, замонавий билим ва касб-ҳунарларни эгаллаши бугунги куннинг долзарб вазифаси эканлиги таъкидланди. Муқаддас манбаларда ҳам илм олиш ҳар бир эркак ва аёл учун фарз экани аниқ далиллар ёрдамида ёритиб берилди.
Қайд этиш жоизки, ўтказилган йиғилиш ва учрашувлар иштирокчиларда тинчликни асраб-авайлашга дахлдорлик ҳиссини кучайтириб, уларда катта таассурот қолдирди. Иштирокчилар томонидан берилган саволларга ҳаётий мисоллар асосида жавоблар берилди. Иштирокчиларга жойларда тинчлик-осойишталикни сақлаш, ижтимоий-маънавий муҳит барқарорлигини таъминлашда ҳар бир масъул ходим, ҳар бир фуқаро томонидан амалга оширилиши лозим бўлган вазифалар юзасидан тавсиялар берилди.
