ҚОЗОН ШАҲРИДА “МУСУЛМОН ИЛОҲИЁТШУНОСЛИГИ ТАФАККУРИ:МИЛЛИЙ, МИНТАҚАВИЙ ВА ТАМАДДУНИЙ ЎЛЧОВЛАР” МАВЗУИДА ХАЛҚАРО КОНФЕРЕНЦИЯ БЎЛИБ ЎТДИ
Имом Бухорий номли Тошкент ислом институти Маънавият ва маърифат ишлари бўйича проректори Жаҳонгир Мелиқўзиев шу йилнинг 6-10 октябрь кунлари Татаристон Республикасининг пойтахти Қозон шаҳрида бўлиб қайтди.
Ж.Мелиқўзиев ташриф чоғида Татаристон мусулмонлари диний идораси раиси, муфтий Камиль Самигуллин қабулида бўлди ҳамда Қозон шаҳридаги “Оқ масжид” мажмуасида шу йилнинг 7 октябрь куни ўтказилган “Мусулмон илоҳиётшунослиги тафаккури: миллий, минтақавий ва тамаддуний ўлчовлар” мавзусида халқаро илмий-амалий конференцияда ўзбекистонлик вакил сифатида қатнашди.
Вакилимиз Ўзбекистон мусулмонлари идораси номидан Татаристон мусулмонлари диний идораси раиси, муфтий К.Самигуллинга “Смута ИГИЛ” китобини тақдим қилди. Суҳбат чоғида муфтий ҳазратлари К.Самигуллин Ўзбекистоннинг буюк алломалар юрти экани, турли ёт ғояларга қарши курашда уларнинг маънавий меросининг бутун мусулмон дунёсига фойдаси, хусусан, Имом Мотуридий, Имом Насафий асарларидан ҳозиргача асосий манба сифатида фойдаланиб келинаётганини алоҳида таъкидлади ва Татаристон мусулмонлари идораси фаолияти ҳақида қисқача сўзлаб берди.
Мазкур ташриф икки томон Татаристон ва Ўзбекистон ўртасидаги дўстона ҳамкорлик муносабатлари ривожига ўз ҳиссасини қўшишига умид қилинади.