ҚАШҚАДАРЁ ВИЛОЯТ ВАКИЛЛИГИДА ОТИНОЙИЛАР ЙИҒИЛИШИ
Мустақиллик йилларида юртимизда ҳар бир кириб келаётган йилга муносиб ном бериш гўзал бир анъанага айланган. 2016 йил “Соғлом она ва бола йили” муносабати билан фарзандларимиз ва хотин-қизларга ҳам алоҳида эътибор берилиб, жойларда шу мавзуга доир хайрли тадбирлар амалга оширилмоқда.
Ҳозирда отинойилар нафақат диний билимлар эгаси, балки юртимизда кечаётган ижобий ўзгаришлар, иқтисодий, таълим ва бошқа соҳаларда олиб борилаётган ислоҳатлар, жамиятимиз маънавий, диний ҳаётида рўй бераётган ўзгаришларнинг фаол иштирокчисига айланишди.
Бунга жорий йилнинг 5 февраль куни ЎМИнинг Қашқадарё вилоятидаги вакиллигида шаҳар ва туманлардаги бош отинойиларнинг умумий йиғилиши мисолдир. Мазкур йиғилишда отинойиларнинг маънавий-маърифий ишлар самарадорлигини янада ошириш, жумладан, турли маросим ва тўй тадбирларини ихчам ўтказишга тарғиб этиш, жойлардаги масжид имомлари, МФЙ, ҚФЙлари билан ҳамкорликда иш олиб бориш масалалари кўриб чиқилди.
Шунингдек, ёшлар ҳамда хотин-қизларнинг турли мутаассиблик ва ақидапарастлик ғояларидан ҳимоя қилиш, бизга ёт оқимларнинг сохта даъволарига раддиялар бериш, жонажон юртимиздаги тинчлик ва осойишталикнинг қадрига етиш, унинг шукронасини адо этишга тарғиб қилиш хусусида отинойиларга керакли тавсиялар берилди.