“Кўкалдош” ўрта-махсус ислом билим юртида ўқув семинари
“Кўкалдош” ўрта-махсус ислом билим юртида таълим-тарбия ишлари самарадорлигини янада кучайтириш борасида фан ўқитувчиларининг қисқа муддатли ўқувсеминари ташкил этилди. Унга Ўзбекистон Миллий Университети “Услубият, таҳрир ва интернет журналистикаси” кафедраси мудири, дотсент Латофат Тошмуҳамедова ва Ўзбекистон мусулмонлари идораси таълим ва кадрлар тайёрлаш бўлими ходими Акбаршоҳ Расулов таклиф этилди.
Машғулотлар билим юрти мудири томонидан тасдиқланган жадвал асосида 6-8 январь кунлари бўлиб ўтди.
Шунингдек, машғулотларни ўтказиш учун алоҳида ўқув хонаси ажратилди ва ўқув жараёнига зарур бўлган техник воситалар билан таъминланди.
Билим юрти ўқитувчилари ўқув семинари давомида янги ноанъанавий усуллардан фойдаланиш бўйича билим ва кўникмаларга эга бўлишди. Дарҳақиқат, таълимнинг турли интерфаол усулларидан фойдаланиб, дарсларни ташкил этиш таълим самарадорлиги, сифати ва жўшқинлигини оширади. Шу боис ҳар бир дарсда улардан кенг фойдаланиш мақсадга мувофиқдир.
