"Жўрабек" жоме масжидига илк ғишт қўйилди
Масжидлар Аллоҳнинг байтидир. Ким уни обод қилса, жаннатда у учун бир қаср бино этилиши ваъда қилинган.
Бугун Юртимиздаги икки минг ортиқ жоме масжидларда малакали имом-хатиблар фаолият юритмоқда. Йилдан йилга масжидларнинг обод ва кўркамлиги, намозхонлар учун шарт-шароитларининг яхшиланаётгани қувонарли ҳолдир. Президентимизнинг ташаббуслари билан 2014 йил пойтахтимиздаги “Минор” жоме масжидининг қад ростлаши халқимизни бениҳоя хурсанд қилган эди. Яна Тошкент шаҳрида “Авайхон” жоме масжидининг янги биноси қурилиб битказилди. “Пул емас ота”, “Яккасарой” жоме масжидлари эски биноси ўрнига барча қулайликларга эга, муҳташам янги масжиднинг қурилиши тугалланиш арафасида турибди.
Жумладан, жорий йилнинг 18 март куни пойтахтимиздаги “Жўрабек” жоме масжидининг янги биноси қурилиши учун биринчи ғишт қўйилди. Ўзбекистон мусулмонлари идораси раиси, муфтий Усмонхон Алимов бошчилигида таниқли уламолар ва Вазирлар Маҳкамаси ҳузуридаги Дин ишлари бўйича Қўмита бўлим бошлиғи Муҳаммадбобур Йўлдошев ҳамда фахрий имомлар табаррукан масжиднинг биринчи ғиштини қўйиб бердилар. Қуръон тиловати қилиниб, ўтганлар ҳақига бағишланди ва тинч, осуда Ватанимиз, фаровон ҳаётимизнинг давомийлигини сўраб хайрли дуолар қилинди.
Яшнобод туманида жойлашган “Жўрабек” жоме масжидининг янги биноси хонақоҳи 650 ўринга мўлжалланган. Масжид битта минора, гумбаз ва муҳташам айвонлардан иборат лойиҳа чизмаси асосида барпо этилмоқда. Ихлос ва эътиқодли халқимиз масжид қурилиши ҳашарида фаол иштирок этишмоқда.
“Ислом нури” таҳририяти
muslim.uz