Жиззахда тинчликни асрашга бағишланган йиғилиш бўлиб ўтди
2015 йил 27 ноябрь куни Жиззах вилоятида ижтимоий-маънавий муҳитни янада соғломлаштириш ҳамда тинчлик-осойишталикни асраб-авайлашга бағишланган йиғилиш бўлиб ўтди. Унда кенг жамоатчилик вакиллари, имом-хатиблар ва мутасадди ташкилотлар масъуллари иштирок этишди.
Йиғилишда сўзга чиққанлар тинчлик-хотиржамлик неъмати ҳақида гапириб, унинг қадрига етиш ва доимо огоҳ бўлиш лозимлигини таъкидлашди. Улар ўз чиқишларида муқаддас динимизнинг эзгу ва тинчликпарварлик ғояларини халқимизга етказиш, жамиятда баркамол авлодни тарбиялаш, кишиларнинг руҳий-маънавий оламини бойитиш, ёшларимизни турли бузғунчи оқимлар таъсирига тушиб қолишидан сақлаш ҳамда миссионерлик каби хатарли иллатларнинг олдини олиш,бугунги кунда имом-хатиблар ва дин пешволарининг энг долзарб вазифалари эканини таъкидлашди.
Шунингдек, йиғилишда бугунги кунда турли террорчилик ҳаракатларини амалга ошириб дунё ҳамжамиятини ташвишга солаётган, ўзини “Ироқ ва Шом ислом давлати”деб атаган террорчилар тўдасининг барча хатти-ҳаракатлари муқаддас динимиз тамойилларига мутлақо зид экани, мана шундай дин душманларининг кирдикорларини халққа, хусусан, ёшларга етказиш лозимлиги уқтирилди.
Тадбирда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раиси Ортиқбек Юсупов ва Ўзбекистон мусулмонлари идораси раиси, муфтий Усмонхон Алимов ҳазратлари қатнашишди.
Ўзбекистон мусулмонлари идораси aхборот хизмати