Имом-хатиблар Наврўз байрами тадбирларида
Наврўз айёми халқимиз учун шарқона янги йилнинг бошланиши, энг қадимий, асл миллий, энг ардоқли байрамдир. Наврўз деҳқончилик ишларининг бошланиши, янги мавсумга кириш вақти саналади. Бу кунларда азал-азалдан оммавий халқ сайиллари уюштирилган, янги униб чиққан кўкатлардан, баҳорий таомлар: сумалак, ҳалим, кўксомса, кўкчучвара каби тансиқ таомлар пиширилган. Юртимиз мустақилликка эришганидан кейин бошқа қадриятлар қатори Наврўз байрами ҳам қайта тикланди. У ҳозир мамлакатимизда умумхалқ байрами сифатида кенг нишонланмоқда. Ҳар йили мамлакатимиздаги барча шаҳар ва қишлоқларда байрам сайиллари, томошалар, бошқа байрам тадбирлари ўтказилади, айни пайтда хайрия ташкилотлари ёрдамида меҳрибонлик уйлари тарбияланувчилари, уруш ва меҳнат фахрийлари, ёлғиз кексалар, ногиронлар ҳолидан хабар олинади, уларни байрам билан қутлаб, турли совғалар, хайр-эҳсонлар тақдим этилади. Байрам муносабати жойларда ўтказилаётган тадбирларда имом-хатибларимиз ҳам фаол иштирок этмоқдалар. Тошкент шаҳридаги "Носирхон" жоме масжиди имом-хатиби Жасур Раупов Фарғона вилояти Тошлоқ ва Марғилон туманларида ўтказилган Наврўз байрами, шунингдек, маънавий муҳитни соғломлаштириш, ёшларни ёт ғоялар таъсиридан ҳимоя қилиш мақсадида ўтказилган йиғилишларда иштирок этиб, Наврўз байрами билан йиғилганларни муборакбод этиб, муқаддас динимизнинг соф фитрати тинчлик ва эзгулик эканлиги ҳақидаги маъруза билан чиқиш қилди.
