Имом Бухорий халқаро марказида диний ходимларнинг ўқув-машғулотлари бошланди
Жорий йилнинг 4 январь куни Имом Бухорий халқаро марказида диний ходимларнинг навбатдаги II давра IV босқич ўқув-машғулотлари бошланишига бағишланган тадбир бўлиб ўтди. Унда Қорақалпоғистон Республикаси, вилоятлар ва Тошкент шаҳридан танлаб олинган 70 нафар масжид имом-хатиблари иштирок этдилар.
Мазкур тадбирда марказ раҳбари, Дин ишлари бўйича қўмита ва Ўзбекистон мусулмонлари идорасининг масъул ходимлари тингловчиларни янги ўқув-машғулотларининг бошланиши билан қутлаб, Ўзбекистон Республикаси Президенти ташаббуси билан ташкил этилган Имом Бухорий халкаро маркази, унинг мақсад ва вазифалари ҳақида батафсил маълумотлар бердилар.
Марказ тингловчилари ҳукуматимиз томонидан мустақиллик йилларида миллий ва диний қадриятларга, эътиқод эркинлигига берилаётган юксак эътибор ва диний ходимларнинг билим савиясини янада такомиллаштириш мақсадида ташкил этилган, барча шароитларга эга бўлган ушбу илм ва маърифат маскани учун Президентимизга самимий миннатдорчилик туйғуларини изҳор этиб, дуои хайрлар қилдилар.
Марказда тингловчиларнинг самарали таҳсил олишлари, ётоқхонада мазмунли ҳордиқ чиқаришлари учун барча шароитлар яратилган. II давра IV босқич тингловчилари дастлабки машғулотларни кўтаринки кайфиятда бошладилар ва марказда яратилган шарт-шароитлар учун ўзларининг ташаккурларини изҳор қилдилар.
Ўқув-машғулотлари 2016 йилнинг 4 март кунига қадар давом этади.
