Хайр-саховат рейтингида Ўзбекистон 145 та давлат ўртасида 27-ўринни эгаллади
Буюк Британиянинг Чаритис Эйд жамғармаси 10 ноябрда аҳолиси фаол даражада хайр-саховат билан шуғулланувчи, яъни ўзининг шахсий пуллари ва вақтини муҳтож одамлар ва беморларга сарфлайдиган давлатлар рейтингини чоп этди.
Бу борада 1-ўринни Бирма (Мьянма), 2-ўринни АҚШ, 3-ўринни эса Янги Зеландия эгаллади.
Ўзбекистон бу рўйхатнинг 27-ўринига лойиқ деб топилди. Ўзбекистондан бу борада собиқ иттифоқ давлатлари ўртасида фақатгина 18-ўринни эгаллаган Қирғизистоннинг рейтинги баландроқ бўлди.
Собиқ иттифоқнинг қолган давлатлари рейтингдан қуйидагича ўрин олди: Қозоғистон – 56-ўрин, Туркманистон – 71, Тожикистон – 73, Украина – 89, Эстония – 99, Беларусь – 103, Латвия – 110, Грузия – 112, Молдова – 120, Озарбайжон – 122, Россия – 129, Арманистон – 138, Литва – 142.
Ҳаммаси бўлиб рейтингда 145 та давлат ва ҳудуд баҳоланди.
