“Ҳаж-2015” мавсумига тайёргарлик бўйича Наманган вилоятида йиғилиш ўтказилди
Жорий йилнинг 26 август куни Наманган халқаро аэропортидаги шароитлар билан танишиш, аэропортда ташкилий ишларга масъул идора ва ташкилотлар аъзолари билан учрашиш ҳамда вилоятда “Ҳаж-2015” мавсумига кўрилаётган тайёргарлик ишлари билан яқиндан танишиш мақсадида Дин ишлари бўйича қўмита раиси О.Юсупов Наманган вилоятида хизмат сафарида бўлди, хабар беради www.religions.uz
Йиғилишда “Ўзбекистон ҳаво йўллари” МАК, ИИВ, Соғлиқни сақлаш вазирлиги, Давлат божхона қўмитаси, Давлат чегараларини ҳимоя қилувчи қўмита, Ўзбекистон мусулмонлари идораси, “Маҳалла” ҳайрия жамоат фонди ҳамда “Нуроний” жамғармаларининг водий вилоятларидаги вакиллари иштирок этдилар.
“Ҳаж” ва “Умра” тадбирларини ташкил этиш ва ўтказиш масалалари бўйича Жамоатчилик кенгаши қарорига асосан “Ҳаж-2015” мавсумида Андижон, Наманган ва Фарғона вилоятлари зиёратчилари Наманган халқаро аэропортидан Мадина шаҳрига учиши белгиланган. Шу муносабат билан зиёратчиларга қулай шарт-шароитлар яратиш ҳамда сафаролди тайёргарлик ишларини юқори даражада ташкил этиш бўйича “Ҳаж-2015” мавсумига алоқадор мутасадди идора ва ташкилотлар билан ҳамкорликда тадбирлар ишлаб чиқиш тавсия этилди.
