Хадичаи Кубро мадрасасида Мавлиди шариф
Юртимизга Рабиъул аввал ойи ташриф буюргач, Пайғамбаримиз Муҳаммад саллоллоҳу алайҳи васалламнинг сийратларини ўрганиш, хайрли тадбирлар амалга ошириш яхши анъанага айланган. Хусусан, 13 Рабиъул аввал куни, 24 декабрь санасида Хадичаи Кубро мадрасасида мавлиди шариф тадбири ташкил этилди. Тадбирга Ўзбекистон Мусулмонлари идораси хотин қизлар бўлимидан Марям Абдуллаева иштирок этди.
Мавлид тадбирининг асосий қисмидан аввал декабрь-араб тили фан ойлиги муносабати билан ойликда қатнашган талабаларнинг тўплаган натижалари ва ижодий иш баҳолари эълон қилинди. Унга кўра жами 40 та талаба иштирок этиб, қуйидаги талабалар диплом ва эсдалик совғалари билан тақдирланди:
Олий ўрин - “Фасоҳат соҳибаси”: Исоқжонова Муҳсина(3-курс)
1-ўрин: Шуҳратова Марям (3-курс), Юсуфий Рокия (2-курс)
2-ўрин: Орифжонова Гулҳаё (3-курс), Мўминова Азиза (2-курс)
3-ўрин: Маликова Муаттар (4-курс), Маҳмудова Муниса (2-курс)
Тақдирлашдан сўнг, мавлид тадбири маҳсус саҳна декорациялари ва саҳналаштирилган лавҳалар асосида бўлиб ўтди. Аввало, Пайғамбаримиз саллоллоҳу алайҳи васаллам рисолатларидан олдинги жоҳилият давридаги рибохўрлик, қизларни тириклайин кўмиш, аёлларнинг розиликларисиз никоҳлаб олиш талаба қизлар томонидан маҳорат билан ижро этилди. Сўнг Расулуллоҳ саллоллоҳу алайҳи васалламнинг ҳамида ахлоқларидан сўзловчи сийратлари ҳақида ҳикоя қилинди. Кейинги саҳналарда саҳобаи икромларнинг Расулуллоҳ саллоллоҳу алайҳи васалламга бўлган муҳаббатлари намойиш этилди. Ундан сўнг Сарвари коинотнинг аҳли аёлларига кўрсатган лутфу марҳаматлари, гўзал муносабтлари шеърий тарзда баён этилди. Охирги саҳна ижросида Пайғамбаримизни йиғлатган воқеалар кўрсатиб берилди. Талаба қизлар томонидан Ул Зотга аталган саловатлар ижро этилди, ширинликлар улашилди.
Тадбир сўнггида мадраса мудираси Ибрагимова Нозима барча йиғилганларни мавлид ойи билан табриклаб, юртимизда мана шундай муборак байрамлар ўтказилаётгани, ёшларга, диний қадриятларимизга кўрсатилаётган ғамхўрликдан манун эканлиги таъкидлади. Тадбир файзли ва хайрли дуолар билан якунланди.
Гулобод Қурбонова
Хадичаи Кубро аёл қизлар ўрта махсус ислом билим юрти ўқитувчиси
