"ХАДИЧАИ КУБРО" да сумалак сайли
Тинч ва осойишта юртимизни баҳор ўз таровати ила безаган. Мана шундай гўзал ва шукуҳли кунларимизга байрамлар, тўйлар ярашади. Хадичаи Кубро аёл-қизлар ўрта махсус ислом билим юртида ҳам жорий йил 16 март куни катта шодиёна нишонланди. Мадрасамизнинг аҳил устозлари ҳамда қўлигул талаба қизлари биргаликда сумалак тайёрлашга енг шимардилар.
Аввало, эрта тонгда яхши ният, чиройли дуолар билан катта дошқозонга сумалак солинди. Баҳорнинг бетакрор таомларидан бўлмиш кўк сомса, кўк чучвара, турфа ширинликлар, дармон дориларга бой салатлар тайёрланди.
Сўнг билим юртининг барча устоз ва талабаларига катта дастурхон ёзилиб, тиловат Қуръон қилиниб, хайрли дуолар сўралди. Файзли зиёфатдан сўнг 17 март куни “Балли қизлар” мусобақасига қизғин тайёргарлик бошлаб юборилди. Яшариш ва яшнаш байрам барчамизга муборак бўлсин!
