ЭНГ ФАОЛЛАР ТАҚДИРЛАНДИ
Якунига етган 2015 йил Ўзбекистон мусулмонлари идораси учун жуда ҳам сермаҳсул бўлди. Буни ўтган йил давомида қўлга киритилган бир қатор ютуқ ва муваффақиятлар мисолида ҳам яққол кўриш мумкин. Жумладан, диний идора томонидан амалга оширилган хайрли ишлар, маънавий-маърифий тадбирлар, халқаро ҳамкорликнинг ижобий натижалари, имом-хатибларнинг дунёнинг турли шаҳарларида бўлиб ўтган тадбирлардаги муносиб иштироки фикримизнинг исботидир.
Ўзбекистон мусулмонлари идораси раиси, муфтий Усмонхон Алимов ҳазратлари мана бир неча йилдирки дунёдаги энг нуфузли 500 та мусулмонлар сафидан жой олиб келмоқдалар, Шайх Абдулазиз Мансур жаноблари нуфузли халқаро ташкилотларнинг доимий аъзоси сифатида фаолият юритаётганларини алоҳида таъкидлаш керак. Шунингдек, Ўзбекистон мусулмонлари идораси раиси ўринбосари Айдарбек Тулеповнинг “ИШИД фитнаси” номли китоби халқаро ҳамжамиятнинг эътиборини ўзига тортмоқда ҳамда ушбу китоб ўзбек ва рус тилларида нашр этилиб, дунёнинг кўплаб давлатларига тақдим этилди. Айдарбек Тулеповнинг “Интернетдаги таҳдидлардан ҳимоя” номли ўқув қўлланмаси эса республикада “Йилнинг энг яхши китоби” деб эътироф этилди.
Мана шундай муваффақиятларга эришишга даъват этиш ва сидқидилдан меҳнат қилаётган мутахассисларни рағбатлантириш ҳамда ходимларни янги 2016 йил – “Соғлом она ва бола йили” билан табриклаш мақсадида, 2015 йил 31 декабрь куни Ўзбекистон мусулмонлари идорасида байрам тадбири ўтказилди. Унда йил ҳисоби қилинди, эзгу тилаклар билдирилди, шунингдек, “Энг фидоий ходим”, “Энг ташаббускор ходим”, “Энг интизомли ходим”, “Энг фаол имом-хатиб”, “Энг илғор ўқитувчи” каби йўналишлар бўйича диний идора тизимида ишлаётган бир гуруҳ ходимлар мақтов ёрлиқлари ва қимматбаҳо совғалар билан тақдирланди.
Ўзбекистон мусулмонлари идораси aхборот хизмати
